په خوست او پکتیا ولایتونو کې د افغانستان بانک د کارکوونکو او صرافانو لپاره ښوونیز ورکشاپونه جوړ شول

Mpoya
دوشنبه ۱۳۹۸/۴/۳ - ۱۱:۱۴
په خوست او پکتیا ولایتونو کې د افغانستان بانک د کارکوونکو او صرافانو لپاره ښوونیز ورکشاپونه جوړ شول

کابل، د ۱۳۹۸ کال د غبرګولي ۲۹ او د چنګاښ لومړۍ – د افغانستان بانک د مالي چارو د څارلو د لوی آمریت له لوري په خوست او پکتیا ولایتونو کې د صرافانو او د افغانستان بانک د سویل ختیځ زون د ولایتي نمایندګیو کارکوونکو ته د افغانستان بانک د قوانینو په اړه د پوهاوي ښوونیز ورکشاپونه جوړ شول.

په هغه ښوونیز ورکشاپ کې چې د غبرګولي د میاشتې په ۲۹ مه نېټه د سویل ختیځ زون په مرکز ګردیز کې جوړ شوی ؤ د دې زون کارکوونکو ته په کې د افغانستان بانک د مرکزي دفتر د مسئولینو له لوري په رڼه توګه د پولي خدمتونو د وړاندې کولو او د دې بانک د قوانینو د تطبیق په اړه معلومات ورکړل شول.

همدارنګه د روان کال د چنګاښ د میاشتې په لومړۍ نېټه په خوست ولایت کې هم د افغانستان بانک د استازو له لوري د دې ولایت صرافانو او د افغانستان بانک کارکوونکو ته د صرافانو او پولي خدمتونو د کړنو د تنظیم، د شرکتي او انفرادي جوازونو د صادرلو او کړنو د څرنګوالي په اړه معلومات وړاندې شول.

په یاد ورکشاپ کې د صرافانو او پولي خدمتونو د وړاندې کوونکو څخه د څارنې د مدیریت مرستیال ښاغلي شفیق الله شینواري وویل، د دې لپاره چې یوه ښه او باثباته مالي څارنه رامنځته شي لازمه ده چې د افغانستان بانک د قوانینو په اړه خبرتیا شتون ولري.

د دې ښوونیز ورکشاپ په بله برخه کې د افغانستان بانک د سویل ختیځ زون آمر ښاغلي معلم شاه نیکیار یادونه وکړه چې دافغانستان بانک هڅه کوي چې خپلې ټولې چارې له نړیوالو قوانینو سره برابر کړي.

نوموړي د یاد ولایت له صرافانو، د پولي خدمتونو د شرکتونو له استازو څخه وغوښتل چې خپلې چارې د افغانستان بانک د قوانینو مطابق مخته یوسي.

د یادونې وړ ده چې په دې ورکشاپ کې د خوست مرستیال والي ښاغلي عبدالواحد پتمن هم ګډون کړی ؤ او نوموړي په راکړه ورکړه کې د افغانیو په کارونه او د هغه په اهمیت خبرې وکړې.

ښاغلي پتمن وویل، افغانۍ زموږ ملي هویت دی او په کار ده چې د دغه ملي هویت په ترویج او ساتنه کې ټول ونډه واخلو.

ورپسې د خوست د صرافانو اتحادیې رئیس ښاغلي حاجي دیندار هم خبرې وکړې، د افغانستان بانک د قوانینو ستاینه یې وکړه او د دې قانون په تطبیق کې یې د هر ډول همکارۍ ژمنه وکړه.

پاتې دې نه وي چې په دې ورکشاپ کې د افغانستان بانک د سویل ختیځ زون د یو شمېر کارکوونکو سربېره تر دوه سوه زیاتو صرافانو او د مالي خدمتونو وړاندې کوونکو ګډون کړی وو او په دې زون کې یې د دې ډول زیاتو ورکشاپونو د جوړولو غوښتنه وکړه.

وروستي خبرونه

یکشنبه ۱۳۹۸/۴/۳۰ - ۱۶:۱۰
Background image

د پیسو د نړیوال صندوق له پلاوي سره د افغانستان پلاوي غونډه ترسره کړه

د پیسو له نړیوال صندوق سره د افغانستان بانک او مالیې وزارت نوبتي غونډه د ۱۳۹۸ کال د چنګاښ د میاشتې تر ۱۹- ۲۴ نیټې پورې د ګرجستان په هېواد کې ترسره شوه.

دا غونډه د یادو ادارو د جوړښتونو. . .

یکشنبه ۱۳۹۸/۴/۳۰ - ۱۱:۵۱
Background image

د افغانستان بانک 30 میلیونه امریکايي ډالره لیلاموي

کابل، 1398 کال د چنګاښ  30ـ د افغانستان بانک غواړي چې د 1398 کال د چنګاښ میاشتې په 31 نېټه د دوشنبی په ورځ د داوطلبۍ په ترڅ کې شاوخوا 30 میلیونه امریکايي ډالره د یوې ازادې او رڼې پروسې. . .

چهارشنبه ۱۳۹۸/۴/۲۶ - ۱۵:۴۸
Background image

په بانکونو کې د امنیتي لګښتونو د راکمولو په اړه غونډه جوړه شوه

کابل، د ۱۳۹۸ لمریز کال د چنګاښ ۲۶ مه – په افغانستان بانک کې د بانکونو د امنیتي لګښتونو د راکمولو په اړه غونډه جوړه شوه.

دا غونډه چې د افغانستان بانک د سرپرست او لومړي مرستیال ښاغلي. . .

بېرته خبرونه ته