د افغانستان بانک سرپرست د بریښنایي اداینو د شرکتونو له استازو سره ولیدل
۱۳۹۹ مرغومی ۲۷- د افغانستان بانک سرپرست ښاغلي اجمل احمدي د بریښنایي اداینو د شرکتونو له استازو سره ولیدل.
د دې لیدنې په ترڅ کې له ګډون کوونکو استازو څخه هر یو یې د بریښنایي ورکړو د جوازونو د اخیستلو په برخه کې شته ستونزې او ننګونې د افغانستان بانک له سرپرست ښاغلي اجمل احمدي سره شریکې کړې او په دې برخه کې یې د مناسبو حل لارو غوښتنه وکړه.
ورپسې ښاغلي اجمل احمدي د دې خبرې د څرګندولو ترڅنګ چې د افغانستان بانک په دې هڅه کې دی څو په هېواد کې د اداینو په برخه کې د اړینو اسانتیاوو د رامنځته کولو په موخه د بریښنایي ورکړو د ودې زمینه برابره کړي، ژمنه وکړه چې په دې برخه کې به شته ننګونو ته رسیدنه وشي.
د افغانستان بانک له همدې کبله ډاډ ورکوي چې د بریښنایي اداینو د سیستم ودې لپاره د زمینې برابرولو او د مناسب او معیاري چاپیریال د رامنځته کولو کې په موخه به د هېواد د مالي، بانکي او اداینو د سکتور اړوندو قوانینو په اډانه کې بې دریغه هلې ځلې وکړي.
