د افغانستان او ترکمنستان ترمنځ د ستراتیژیکو هوکړهلیکونو د لاسلیک په اړه غونډه
۱۴۰۰ کال د غبرګولي ۱۳ مه – د افغانستان بانک د سرپرست ښاغلي اجمل احمدي په مشرۍ د افغانستان او ترکمنستان تر منځ د ګډو اقتصادي پروګرامونو د هوکړه لیکونو د لاسلیک په اړه غونډه جوړه شوه. په دې غونډه کې د یادو هوکړه لیکونو د لاسلیک او په دې برخه کې د چمتوالي په اړه بحث او د نظرونو تبادله تر سره شوه.
ټاکل شوې ده چې د افغانستان او ترکمنستان چارواکي د روان کال د غبرګولي میاشتې په ۱۵ - ۱۶ نېټه د همکاریو پنځه هوکړه لیکونه د اوسپنې پټلۍ، برېښنا، د مرمر ډبرو او صنعت برخه کې په هرات ولایت کې لاسلیک کړي.
په دې غونډه کې د افغانستان بانک سرپرست ښاغلي اجمل احمدي د دوست هېواد ترکمنستان له نېک نیت څخه د مننې تر څنګ یادونه وکړه چې افغانستان به د یو ستراتيژیک شریک په توګه د لویو اقتصادي پروژو د تطبیق په برخه کې چې د سیمې هېوادونو د پرمختګ لامل شي هېڅ ډول همکاري درېغ نه کړي.
د یادونې وړ ده چې په دې غونډه کې د افغانستان د سرپرست ښاغلي اجمل احمدي سربېره، د افغانستان برېښنا شرکت رئیس، د ملي تدارکاتو ادارې رئیس، د مالیې او بهرنیو چارو وزارت معینانو، د کانونو او پترولیم وزارت د ټاپي پروژې نماینده او یو شمېر نورو ادارو استازو ګډون کړی وو.
