د کاردان پوهنتون محصلینو لپاره د یو ورځني ښوونیز سیمینار جوړول
۱۴۴۵ کال د ربیع الثاني ۳۰ مه – د افغانستان بانک په هېواد کې د بانکي سکتور او د اسلامي بانکوالۍ د پراختیا په تړاو د کاردان پوهنتون محصلینو لپاره یو ورځنی ښوونیز سیمینار جوړ کړ. د دې سیمینار د جوړېدو موخه د بانکي سکتور د ګمارنې له تګلارو سره د محصلینو بلدتیا، د اسلامي بانکوالۍ پراختیا او د عامه ذهنونو په روښانه کولو کې د علمي بنسټونو رول او د دې سکتور د لا زیاتې ودې لپاره د زمینې برابرول ګڼل کېږي.
د سیمینار په پیل کې د کاردان پوهنتون د اقتصاد پوهنځي رئیس ښاغلي حبیب ګل ځدران د افغانستان بانک پلاوي ته ښه راغلاست وویل او د محصلینو لپاره یې د دې ډول پروګرامونو جوړول ارزښتناک وبلل. هغه زیاته کړه چې محصلین په پوهنتونونو کې له تیورۍ سره زیات مخ کېږي او که چېرې عملي پروګرامونو ته لکه داسې سیمینار چې د افغانستان بانک په نوښت جوړ شوی دی، زمینه برابره شي، د هېواد د مسلکي کادرونو راتلونکی به اغېزناکه او د مسلکي ظرفیتونو د لوړولو په برخه کې ګټور ثابت شي.
ورپسې؛ د افغانستان بانک د ریاست د دفتر لوی آمر ښاغلي صدیق الله خالد وویل چې علمي بنسټونه د راتلونکو نسلونو په روزنه او ظرفیت جوړونه کې اغېزناکه رول او ځانګړی ارزښت لري. ښاغلي خالد زیاته کړه چې د افغانستان بانک تل هڅه کړې څو د اصلي دندو د ترسره کولو ترڅنګ د هېواد له پوهنتونونو سره خپلو اکاډمیکو همکاریو ته دوام ورکړي.
د افغانستان بانک د ریاست د دفتر لوی آمر د خپلو خبرو په بله برخه کې زیاته کړه چې بانکي سکتور د ښه والي په لور روان دی او د افغانستان د خلکو په ځانګړې توګه علمي بنسټونو ټولیز ملاتړ ته اړتیا لري. هغه په هېواد کې اسلامي بانکوالي یوه جدي اړتیا وبلله او زیاته یې کړه چې اوس مهال اسلامي بانکوالي د خوندیتوب پر بنسټ نه یوازې په اسلامي هېوادونو بلکې په ډېرو غیر اسلامي هېوادونو کې هم دود شوې او دا بهیر په چټکتیا سره د پراختیا په لور روان دی.
ښاغلي خالد زیاته کړه چې الحمد لله؛ افغانستان یو بشپړ اسلامي هېواد دی او اسلامي بانکوالي به ډېر ژر په یو بریالي سکتور بدل شي. نوموړي د کاردان پوهنتون له استادانو او محصلینو وغوښتل څو د دې سکتور د لا زیات ترویج او د عامه ذهنونو په روښانه کولو کې خپلې هڅې وکړي.
د سیمینار په دوام کې د بانکي څارنې د لوی آمریت مرستیال، ښاغلي احسان الله منصور د تېرو دوو کلونو په اوږدو کې د بانکي سکتور د کړنو په اړه د پریزنټیشن د وړاندې کولو ترڅنګ د دې سکتور له لوړو ژورو څخه یادونه وکړه او د بانکي سکتور اوسنی وضعیت یې د قناعت وړ وباله. ښاغلي منصور د بانکي نظام د ښه والي په برخه کې د افغانستان بانک د پرېکړو او احتیاطي پالیسیو په اړه هم یادونه وکړه او د دې سکتور په وده او پراختیا کې یې د خلکو رول مهم یاد کړ.
د دې سیمینار په بله برخه کې، د اسلامي بانکوالۍ د لوی آمریت مرستیال ښاغلي مفتي عبدالله آخندزاده د اسلامي بانکوالۍ د ګټو په اړه خبرې وکړې او په کړکېچونو، په ځانګړې توګه د ۲۰۰۸ زېږدیز کال کړکېچ کې یې د اسلامي بانکوالۍ د خوندي ساتنې عملي بېلګې وړاندې کړې چې په کې د نړۍ ټولو بانکونو چې د سود پر بنسټ یې عمل کاوه، زیان ولید او حتی له دیوالي کېدو سره مخ شول، خو هغو هېوادونو چې اسلامي بانکوالي یې اصل ګرځولی وو، خوندي پاتې شول.
ښاغلي آخندزاده د افغانستان بانک له لوري د وخت له اړتیاوو سره سم هېوادوالو سره د هر اړخیزو تګلارو د طرحه کولو ژمنه وکړه او ویې ویل چې د عملي کولو په برخه کې یې د خلکو او په ځانګړې توګه د علمي او اکاډمیکو بنسټونو ملاتړ ته اړتیا لرو څو له موږ سره اوږه په اوږه کار وکړي او دا سکتور بریالیتوب ته ورسوي.
دا سیمینار د نظرونو په شریکولو، پوښتنو ته د ځوابونو په ویلو او ګډونوالو ته د تصدیق پاڼو په ویشلو سره پای ته ورسېد.
