د ژنیوا په کنفرانس کې د افغانستان بانک د لوی ریاست د سرپرست وینا!
د افغانستان په اړه د ۲۰۲۰ زیږدیز کال پراختیايي کنفرانس د نوامبر په ۲۳-۲۴ نېټه د سویس په ژنیوا کې جوړ شوی. دا کنفرانس د ۲۰۲۱ څخه تر ۲۰۲۴ کلونو لپاره ګډو پراختیايي موخو ته د افغانستان حکومت او نړیوالې ټولنې د ژمنتیا، د پراختيايي مرستو لپاره د همغږۍ او د افغانستان حکومت لپاره له مالي ملاتړ څخه د ډاډ ترلاسه کولو په موخه جوړ شوی، په ګډه توګه د افغانستان د دولت، د فنلنډ د دولت او ملګرو ملتونو د سازمان لخوا پر مخ وړل کیږي.
د افغانستان بانک د لوی ریاست سرپرست ښاغلی اجمل احمدي د نوامبر په ۲۳ نېټه د دې غونډې په لومړۍ ورځ د ویډیو کنفرانس له لارې له نړیوالو منل شویو معیارونو سره برابر د یو پیاوړي مالي سکتور د جوړولو چې وکولای شي د هېواد د تولیدي، خدماتي او پانګونې په برخو کې د نن ورځې اړتیاوې پوره کړای شي په اړه خپله ژمنه ګډونوالو ته څرګنده کړه.
ښاغلي اجمل احمدي د خپلو خبرو په بله برخه کې زیاته کړه چې د افغانستان بانک ژمن دی چې د مطلوبه مقرراتي او څارنیزو معیارونو او مناسبو ستراتیژیو په پام کې نیولو سره د هېواد د مالي او بانکي نظام سلامتیا او ټیکاو وساتي او د مالي خدمتونو د پراختیا لپاره هڅه وکړي.
د افغانستان بانک د لوی ریاست سرپرست په اوسنیو شرایطو کې د هېواد د اداینو دیجیټل کول له فساد سره د مبارزې او په اقتصادي معاملو کې د روڼتیا لپاره مناسبه ټاکڼه وګڼله او ژمنه یې وکړه څو له دې لارې سوداګرو او پانګوالو لپاره لازمې اسانتیاوې برابرې کړي.
د یادونې وړ ده چې په دې کنفرانس کې د نړیوالو سازمانونو ترڅنګ د وزیرانو په کچه د شاوخوا ۷۰ هېوادونو استازي راټول شوي ؤ چې ډېری شمېر ګډونوالو په دې کنفرانس کې له افغانستان سره خپلې مالي مرستې اعلان کړې.