په غلام خان بندر کې د نوې څانګې پرانیسته
۱۴۴۵ جمادي الاول ۲۷ مه – د افغانستان بانک له لوري درنو هېوادوالو ته د غوره خدمتونو وړاندې کولو په موخه په غلام خان بندر کې د نوې څانګې پرانیسته وشوه.
د دغه څانګې د پرانیستې پر مهال د افغانستان بانک د سیستمونو د برخې مسئول ښاغلي روح الله فیضي چې له مرکزي دفتر څخه د تللي پلاوي مشري یې کوله یادونه وکړه چې د افغانستان بانک مشرتابه ژمن دی، ترڅو د درنو هېوادوالو لپاره د هېواد په ټولو برخو کې د غوره بانکي خدمتونو د وړاندې کولو زمینه برابره کړي. نوموړي زیاته کړه د دې څانګې په پرانیستې سره به په غلام خان بندر کې د عوایدو را ټولونې په برخه کې د پام وړ پرمختګ رامنځته شي او د عوایدو را ټولونې چارې به بانکي سیستمونو له لارې تر سره کېږي.
په ورته وخت کې د افغانستان بانک د غلام خان بندر څانګې مدیر ښاغلي مولوي پیر محمد هم خبرې وکړې او خلکو ته یې ډاډ ورکړ چې د افغانستان بانک په نمایندګۍ به د دې څانګې له لارې د غوره بانکي خدمتونو د وړاندې کولو لپاره هلې ځلې کوي.
د غلام خان بندر د پاکستان او افغانستان تر منځ يو له څلورو لويو سوداګريزو لارو دی چې د سوداګرۍ له پلوه له تورخم او چمن وروسته درېيم ځای لري. دغه بندر د شمالي وزيرستان سيمه له خوست ولايت سره نښلوي.
د یادونې وړ ده چې د غلام خان بندر کې د افغانستان بانک د نمایندګۍ د پرانیستې پر مهال د خوست ولایت یو شمېر ولایتي چارواکو او د غلام خان بندر مسئولینو هم ګډون درلود.
