د افغانستان د سرپرست رئیس په مشرۍ د سوداګریزو بانکونو له رئیسانو سره غونډه تر سره شوه
د ۱۴۴۶ د رجب المرجب ۲۶ مه – د افغانستان بانک د سرپرست رئیس ښاغلي نور احمد آغا په مشرۍ د سوداګریزو بانکونو له رئیسانو سره د افغانۍ د ثبات او بانکي سکتور د فعالیتونو د پراختیا په اړه غونډه جوړه شوه.
د دې غونډې په پیل کې د افغانستان بانک د ټولو سرپرست رئیس ښاغلي نور احمد آغا یادونه وکړه چې د افغانۍ د ارزښت ساتنه د افغانستان بانک د کاري لومړيتوبونو په سر کې ځای لري او دا بانک توانیدلی دی چې د بېلابېلو اقداماتو په تر سره کولو سره د افغانۍ له ارزښت څخه ساتنه وکړي.
نوموړي زیاته کړه په تېرو څو ورځو کې د اسعارو پر وړاندې د افغانۍ په نرخ کې تغیرات رامنځته شوي وو، خو د پولي سیاستونو د بېلابیلو ابزارونو او اړینو ګامونو په پورته کولو سره د افغانستان بانک توانیدلی دی چې بازار عادي حالت ته را وګرځوي. ښاغلي نور احمد آغا وویل، چې په دې برخه کې لا هم هلې ځلې روانې دي او په کار ده چې ټولې اړوندې ادارې په پوره همغږۍ کار وکړي.
نوموړي همدارنګه د هېواد په اقتصادي رغښت او پرمختګ کې د سوداګریزو بانکونو پر مثبت رول خبرې وکړي او د بانکونو له رئیسانو یې وغوښتل چې د ملي مسئولیت په پام کې نیولو سره خپل معاملات په افغانۍ تر سره کړي.
د یادونې وړ ده چې په دې غونډه کې د سوداګریزو بانکونو رئیسانو هم د موضوع اړوند نظرونه شریک کړل او له خپله اړخه یې د افغانستان بانک د سپارښتونو د عملي کولو ژمنه وکړه.
د یادونې وړ ده چې په دې غونډه کې د افغانستان بانک د بېلابېلو برخو مسئولینو هم ګډون درلود.
