د افغانستان بانک سرپرست رییس د افغانستان لپاره د ناروې هیواد شارژدافیر سره ولیدل
۱۴۴۵ د محرم الحرام ۳ مه – د افغانستان بانک سرپرست رئيس ښاغلي هدایت الله بدري د ناروی هېواد له شارژدافیر ښاغلي پال کلومین بیکین او مل پلاوي سره د افغانستان بانک په مرکزي دفتر کې وکتل.
په دې کتنه کې د افغانستان او ناروی هېوادونو د دوه اړخیزو اړیکو پیاوړې کولو او د افغانستان د اقتصادي ودې، ثبات او سوکالۍ لپاره د ګډو هڅو او ژمنتیا په اړه بحث او خبرې اترې وشوې.
باید وویل شي چې په دې غونډه کې د دواړو هېوادونو تر منځ پر ګډو همکاریو ټینګار وشو او په ځانګړې توګه په اقتصادي برخو کې همکاري د ارزښت وړ یاده شوه.
د یادونې وړ ده چې د افغانستان بانک د هېواد د مرکزي بانک په توګه ژمن دی چې له ټولو نړیوالو هېوادونو، په ځانګړې توګه له مالي او بانکي بنسټونو سره د نړیوالو قوانینو او مقرراتو په رڼا کې غوره بانکي اړیکې ولري او دې اړیکو ته پراختیا ورکړي.
