د افغانستان بانک د فوټبال لوبډلې د دولتي ادارو په لوبو کې دویم مقام خپل کړ
کابل، د1397 د کب 9 مه - د دولتي ادارو د فوټبال لیګ په سیالیو په لړ کې چې د دولتي ادارو لوبډلو ترمنځ په لاره اچول شوې وې، د افغانستان بانک د فوټبال لوبډلې دویم مقام تر لاسه کړ.
دغه دوستانه سیالۍ هر کال يو ځل په لاره اچول کېږي چې د روان لمریز کال د لیندۍ 30 نیټې په پیلیدو سره د فوټبال فدراسیون تر نظر لاندې د دولتي ادارو تر منځ په غازي لوبغایي کې په لاره واچول شوې.
د دې سیالیو په وروستۍ ورځ کې چې د کابل فدراسیون په شين میدان کې په لاره اچول شوې وه، د افغانستان بانک لوبډله د ښار او کور جوړونې وزارت لوبډلې په وړاندې میدان ته ولاړه چې په پای کې سیالۍ د 1-2 ګولونو سره د ښار جوړونې وزارت په بریا پای ته ورسیده.
د دې سیالیو موخه د کارکوونکو د سلامتیا او روغتیا سر بېره، د دوستانه اړیکو ټینګول او په دولتي ادارو کې د همکارۍ روحیې دودول په ګوته شوي دي.
د یادونې وړ ده چې د دې سیالیو په پای کې جایزې، مډالونه او ستاینلیکونه چې د افغانستان د فوټبال فدراسیون له خوا چمتو شوي وو، د لومړي او دویم مقام لوبډلو ته وویشل شوې چې په دې منځ کې د افغانستان بانک د فوتبال لوبډلې 12 مډالونه، څلور ستاینلیکونه او د ګول تنډیس ښاغلي سید محسن سادات ته ورکړل شو.
د یادونې وړ ده چې په سږنیو سیالیو کې د افغانستان بانک لوبډلې سر بېره، د مشرانو جرګې لوبډلې، ولسي جرګې لوبډلې، د مالیې وزارت لوبډلې، د کور جوړونې تصدي لوبډلې، د اراضي اصلاحات لوبډلې، د ښار او کورجوړونې وزارت لوبډلې او اقتصاد وزارت لوبډلې ګډون کړی وو.
