په اداراتو کې د افرادو تغییر او تبدیل د بشري سرچینو یو اصل دی
۱۴۴۶ محرم الحرام ۲۸ مه – د افغانستان بانک د پالیسۍ د ستر سلاکار په ګډون د یو شمېر آمریتونو لپاره آمرین او مرستیالان معرفي شول.
په هغه غونډه کې چې په همدې مناسبت د افغانستان بانک د عالي شورا په تالار کې جوړه شوې وه، د افغانستان بانک لومړي مرستیال ښاغلي صدیق الله خالد په اداراتو کې د افرادو تغییر او تبدیل د بشري سرچینو یو اصل یاد کړ او زیاته یې کړه چې دا تغییر او تبدیل د چارو د لا ښه سمون په موخه رامنځته شوی دی.
د دې تغییر او تبدیل پر اساس د افغانستان بانک د تدارکاتو لوی آمر ښاغلی فدامحمد فیضان د ریاست د دفتر د لوی آمر په توګه، د حقوقي چارو د مشاوریت مرستیال ښاغلی احمد شاه خادم د افغانستان د مالي او بانکي انستیتوت (AIBF) د رئیس په توګه او د اسلامي بانکوالۍ لوی آمر ښاغلی دکتور محمد یوسف سلیم د افغانستان بانک د ریاست مقام د پالیسۍ د ستر سلاکار په توګه معرفي شول.
د یادونې وړ ده چې د اسلامي بانکوالۍ او بانکي څارنې له لویو آمریتونو څخه د بانکي او مالي چوپړتیاوو د څارنې په نوم یو آمریت جوړ شو او د بانکي څارنې لوی آمر ښاغلي شیخ عبدالرحمن قانت د دې آمریت د لوی آمر په توګه معرفي شو.
