د افغانستان بانک سرپرست رئیس په کابل کې د ایران هېواد له سفیر سره ولیدل
۱۴۴۶ د رجب المرجب ۱۱ مه – د افغانستان بانک د ټولو سرپرست رئیس ښاغلي نوراحمد آغا په خپل کاري دفتر کې د ایران هېواد له سفیر ښاغلي علي رضا بیګدلي او مل پلاوي سره وکتل.
په دې کتنه کې د دواړو هېوادونو ترمنځ د سوداګرۍ، بانکي اړیکو او برېښنایي بانکوالۍ د پراختیا په اړه بحث او خبرې اترې وشوې.
په یاده کتنه کې د افغانستان بانک د ټولو سرپرست رئیس ښاغلي نور احمد آغا د ایران او افغانستان ترمنځ د بانکي اړیکو پراختیا او همکاري د سوداګرۍ د ودې لپاره ګډه اړتیا یاده کړه او په دې برخه کې یې له خپله اړخه د همکارۍ ډاډ ورکړ.
نوموړي همدارنګه د سوداګرۍ د پراختیا په برخه کې د برېښنایي بانکوالۍ ونډه د ارزښت وړ وبلله او یادونه یې وکړه چې د افغانستان بانک په هېواد کې د دې بانکوالۍ پراختیا ته ژمن دی او په دې برخه کې به د نړۍ د هېوادونو له تجربو ګټه پورته کړي.
باید وویل شي چې په یاده کتنه کې په کابل کې د ایران هېواد سفیر ښاغلي علي رضا بیګدلي هم د داوړو هېوادونو تر منځ د سوداګرۍ پراختیا او د بانکي سکتور اړیکې د ارزښت وړ یادې کړې او له خپله اړخه یې د همکارۍ ژمنه وکړه.
د یادونې وړ ده چې په دې غونډه کې د افغانستان بانک لومړي مرستیال ښاغلي صدیق الله خالد او مل پلاوي هم ګډون درلود.
