د بانکدارۍ سکټور د ټینګښت او په هېواد کې د مالي خدمتونو د پراختیا غونډه
د ۱۴۴۴ ربیع الثاني ۱۱ – د افغانستان بانک د ریاست د دفتر د لوی آمر ښاغلي صدیق الله خالد په مشرۍ د سوداګریزو بانکونو د مالي او بازار موندنې آمریتونو د آمرینو په ګډون غونډه جوړه شوه.
په پیل کې د افغانستان بانک د ریاست د دفتر لوی آمر ښاغلي صدیق الله خالد د هېواد په اقتصادي وده کې د بانکونو د ارزښت په اړه خبرې وکړې او د غونډې له ګډونوالو یې وغوښتل چې په بانکي محصولاتو کې د نوښتونو په رامنځته کولو، عصري خدمتونو په وړاندې کولو او د مالي خدمتونو په پراختیا سره د بانکي سکتور د ټینګښت په برخه کې خپل مثبت رول تر سره کړي.
ښاغلي صدیق الله خالد د بانکوالۍ سکتور یوه کورنۍ یاده کړه او د سوداګریزو بانکونو له استازو یې وغوښتل چې د سالمې سیالۍ اصل په پام کې نیولو سره له دغه سکتور څخه په جدي توګه ملاتړ وکړي.
ورپسې د سوداګریزو بانکونو استازو د افغانستان بانک سره د بانکي سکتور د لا ښه والي او پیاوړتیا په موخه خپل وړاندیزونه شریک کړل او د هېواد په بېلابېلو برخو کې یې د بانکي سکتور د پراختیا ژمنه وکړه.
