د تدارکاتو قانون او کړنلارې په اړه د دوه اوونیز روزنیز ورکشاپ پای
د ۱۴۴۴ کال د جمادي الثاني ۵ – د افغانستان بانک دویم مرستیال ښاغلي عبدالقدیر احمد په مشرۍ د تدارکاتو قانون او کړنلارې روزنیز ورکشاپ ګډونوالو ته د تصدیق لیکونو ورکولو په تړاو د افغانستان بانک عالي شورا په تالار کې محفل جوړ شو. دا ورکشاپ د ۱۴۴۴ کال د جمادی الاول په ۲۰ نېټه پیل او نن پای ته ورسېد.
په دې محفل کې د تدارکاتو لوی آمر ښاغلي حاجي مولوي فدا محمد فیضان، د بشري سرچینو لوی آمر ښاغلي بشرمل پسرلي، د تدارکاتو آمریت مرستیالانو ښاغلي نجیب الله صافي او احسان الله احسان په ګډون، د بېلابیلو آمریتونو کارکوونکو حضور درلود.
د افغانستان بانک دویم مرستیال ښاغلي عبدالقدیر احمد د دا ډول روزنیزو ورکشاپونو جوړول د کارکوونکو د ظرفیت جوړونې په برخه کې خورا اغېزناک وبلل او زیاته یې کړه چې د افغانستان بانک ژمن دی ترڅو د کارکوونکو ظرفیت او استعدادونو د ارتقا په موخه بېلابېل پروګرامونه جوړ کړي ترڅو هغوی په غوره توګه د هیواد خدمت ته نور هم چمتو شي.
ورپسې حاجي مولوي فدا محمد فیضان او ښاغلي بشرمل پسرلي د تدارکاتو قانون او کړنلارې د روزنیز ورکشاپ اهمیت په اړه خبرې وکړې او یادونه یې وکړه چې په دې ورکشاپ کې د تدارکاتو، بشري سرچینو، مالوماتي ټکنالوژۍ، خدماتو، حقوقي مشاوریت او د مالي چارو آمریتونو ۲۵ تنو کارکوونکو ونډه اخیسته وه.
