د پولي سیاست طرحه او پلي کول
د افغانستان بانک پولي سیاست د پولي سیاست د کمېټې له لارې طرحه او پلي کیږي. دا کمېټه د افغانستان بانک له لوی رئیس، لومړی مرستیال او د عالي شورا نورو غړو څخه جوړه شوې ده. د دې کمېټې رییس د افغانستان بانک لوی رئیس او مرستیال یې د دې بانک لومړی مرسیتال دی، د عالي شورا غړي د کمېټې د غړو او د پولي سیاست لوی آمریت د دې کمېټې د سکرتریت په توګه دندې ترسره کوي.
د پولي سیاست کمېټه د هېواد د پولي او اسعاري سیاستونو د ټاکلو مسئولیت لري چې معمولاً د افغانستان بانک د عالي شورا په غونډه کې ترسره کیږي.
په ټولیزه توګه، دا کمېټه د پولي سیاست د اډانې او عملیاتي موخو د ټاکلو، د مقداري موخو د تصویبېدو، د مبادلې نرخ او د افغانستان د اسعاري ترتیباتو د ټاکلو، د پولي سیاست د ابزارونو او د هغه د کارولو د محدودې او د سوداګریزو بانکونو د الزامي زېرمو د سلنې د ټاکلو په تړاو پرېکړې کوي.