د افغانستان بانک د عالي شورا غونډه جوړه شوه
د ۱۴۴۵ کال د رجب المرجب ۲۹ مه – د افغانستان بانک د ټولو سرپرست رئیس ښاغلي هدایت الله بدري په مشرۍ د عالي شورا غونډه جوړه شوه.
د دې غونډې په پیل کې د افغانستان بانک د ټولو سرپرست رئیس د پولي سیاستونو، بانکي سکتور د وضعیت، اسلامي بانکوالۍ د پراختیا او یو شمېر نورو اړوندو برخو په اړه هر اړخېزې خبرې وکړې او د غونډې له ګډونوالو سره یې د رامنځته شوو پرمختګونو په اړه مفصل معلومات شریک کړل.
په دې غونډه کې د ۱۴۰۲ کال د تېرې نیمایي لپاره د پولي سیاست د تطبیق، د بانکي سکتور، اسلامي بانکوالۍ، ارزي ذخایرو، د ګواښونو او قانون رعایتولو، بشري سرچینو د تشکیلاتي جوړښت د سمون او یو شمېر نورو برخو په اړه راپورونه وړاندې شول.
په یاده غونډه کې د پولي سیاست د کاري کړنلارې، د ۱۴۰۲ کال د دویمې نیمایي لپاره د پولي سیاست د اجمالي پلان، د بېړنیو نقدي مرستو کړنلارې، اسلامي بانکوالۍ د کړنلارې د یو شمېر برخو، د الکترونیکي پیسو د مؤسساتو د تنظیم او څارنې مقررې، د ساحې څخه بهر د تعقیب او څارنې کړنلارې، د پیسو وینځلو او تروریزم د تمویل پر وړاندې د مخنیونکو اقداماتو او مسئولیتونو مقررې، د اسعارو د لیلام مقررې، د افغانستان بانک د داخلي ورکړو ( اداینو) د عملیاتو مقررې، مالي اجارې تنظیم او څارنې مقررې پر تعدیلونو خبرې وشوې او د اړوندو موضوعاتو په اړه لازم تصمیمونه ونیول شول.
همدارنګه په یاده غونډه کې د مالي سلامتیا پر شاخصونو او یو شمېر نورو کړنلارو، تنفیذي اقداماتو، مقرراتو، لارښودونو او لایحو مفصل بحثونه تر سره شول.
د افغانستان بانک عالي شورا په ربعوار ډول کال کې څلور غونډې ترسره کوي او د بانک د سیاستونو، کړنو، اجراآتو او لاسته راوړنو په اړه پکې خبرې اترې او د نظرونو تبادله ترسره او د افغانستان بانک د کړنو او د هېواد مالي او بانکي نظام د پیاوړتیا لپاره په کې اړینې پرېکړې کېږي.
د یادونې وړ ده چې په دې غونډه کې چې د افغانستان بانک د عالي شورا په تالار کې جوړه شوې وه د دې شورا غړو په آنلاین او حضوري ډول ګډون کړی وو.
