د افغانستان بانک خبرتیا
په دې وروستیو کې داسې راپورونه ترلاسه شوي چې ځینې اشخاص په ورځنیو اقتصادي راکړو ورکړو کې د ۱، ۲ او ۵ افغانیو بانکنوټونو او سکو له اخیستلو څخه ډډه کوي. له همدې امله ټولو هېوادوالو ته خبر ورکول کېږي چې د ۱، ۲ او ۵ افغانیو بانکنوټونو په ګډون ټول بانکنوټونه او سکې د هېواد قانوني او مروجې پيسې دي او په ټولو معاملو کې د کارولو وړ دي. هېڅ حقیقي او یا حکمي شخص حق نه لري چې د ورځنیو راکړو ورکړو پر مهال یې له اخیستلو څخه ډډه وکړي.
د افغانستان بانک له ګرانو هېوادوالو څخه غواړي چې د معاملو د آسانتیا، د پولي اصولو د رعایتولو او د هېواد د مالي نظام د ملاتړ په موخه، په خپلو معاملو کې د افغانۍ له ټولو بانکنوټونو څخه ګټه پورته کړي، په سمه توګه یې وکاروي او حفاظت یې وکړي ترڅو له ټاکل شوې مودې څخه مخکې زړې نه شي.
