د افغانستان بانک د عالي شورا غونډه ترسره شوه
د افغانستان بانک عالي شورا د روان کال د چنګاښ د میاشتې په ۱ او ۲ نېټه، د ۱۳۹۸ مالي کال په اوږدو کې خپله دویمه نوبتي غونډه جوړ کړه. غونډه د عالي شورا او د افغانستان بانک د رئیس ښاغلي خلیل صدیق په مشرۍ د عالي شورا د نورو غړو په شتون کې ترسره شوه.
د افغانستان بانک عالي شورا له اجنډا سره سم د تیرو دریو میاشتو په اوږدو کې د مالي چارو د څارنې، د پولي سیاست د تطبیق، حقوقي اډانې، د مالي نظام د ټیکاو او ټینګښت، د مدیریتي چارو او د داسې نورو اړوندو موضوعګانو په برخو کې د افغانستان بانک د کړنو او لاسته راوړنو راپورونه تر بحث او ارزونې لاندې ونیول چې تر ټولو مهمې موضوعګانې یې په لاندې ډول لنډیز کیږي:
• د افغانستان بانک عالي شورا رئیس په پیل کې د هېواد اقتصادي وضعیت چې اقتصادي وده او د ۱۳۹۸ مالي کال له پیل څخه تر اوسه پورې د پولي سیاست د تطبیق راپور چې (د بدلونونو لاملونه، د انفلاسیون د نرخ وضعیت، د اداینو بیلانس، د هېواد د پولي او اسعاري سیاست موخې او اډانه، د پولي سیاست ابزارونه، د پولي زېرمو د ودې بهیر، د اسعارو پر وړاندې د افغانۍ د مبادلې نرخ) او د بانکي نظام وضعیت رانغاړي، تر بحث لاندې ونیول.
• د افغانستان بانک عالي شورا د دې غونډه په اوږدو کې په مالي سکتور کې د مشتریانو د حقونو د ملاتړ مقرره په پرنسیپ کې منظور کړه او د مالي چارو د څارنې آمریت ته یې دنده ورکړه څو یاده مقرره د شکلي او ماهوي سمون لپاره د حقوقي مشاوریت دفتر ته واستوي.
• د غونډې په اوږدو کې د افغانستان بانک د عالي شورا بله د بحث وړ موضوع (له نمایندګیو پرته د بانکدارۍ) مقررې جوړوله چې د هغه په مسودې باندې له غور، څېړنې او د نظرونو له شریکولو وروسته، یاده مقرره په پرنسیپ کې منظور شوه او د مالي چارو د څارنې آمریت ته یې دنده وسپارله څو هغه د شکلي او ماهوي سمون لپاره د افغانستان بانک د حقوقي مشاوریت دفتر ته واستوي او د ریاست د دفتر له آمریت سره په همغږۍ هغه په دواړو رسمي ژبو وژباړي.
• د افغانستان بانک عالي شورا د خپلو مخکینيو تصویبونو په پام کې نیولو سره د بانک د پرانیستلو د جواز صادریدنه د ۱۴۰۰ کال د وري تر لومړی نېټي پورې بنده کړه. د یادونې وړ ده چې د افغانستان بانک عالي شورا په دې غونډه کې د هېواد د مهمو بانکي او اقتصادي مسائلو ترڅنګ په ادارې او عملیاتي موضوعګانو هم بحث او نظرونه سره تبادله کړل او په دې برخه کې لازمه تصمیمونه ونیول شو.
