نویو راستنېدونکو هېوادوالو د هرکلي په موخه تورخم ته د افغانستان بانک د سرپرست رئیس سفر
۱۴۴۵ ربیع الثاني ۲۶ مه – د افغانستان بانک سرپرست رئیس ښاغلي هدایت الله بدري او مل پلاوي له پاکستان څخه د افغان کډوالو د راتګ او هرکلي په موخه تورخم ته سفر وکړ، د دې سفر په اوږدو کې یې د ننګرهار له ولایتي چارواکو، د کډوالو لپاره د ټاکل شویو کمېټو له مسئولینو سره وکتل او د هغو افغانانو وضعیت یې له نږدې ولید چې په دې وروستیو کې له پاکستان څخه خپل هېواد ته راستانه شوي دي.
په دې سفر کې د افغانستان بانک سرپرست رئیس هېوادوالو ته له پاکستان څخه هېواد ته د راتګ د هرکلي تر څنګ افغانستان د ټولو ګډ کور یاد کړ او د آبادۍ په برخه کې یې د ټولو پر ونډې اخیستو ټینګار وکړ.
نوموړي وویل: د افغانستان بانک د خپلې ژمنتیا له مخې چې د هېوادوالو لپاره یې لري، د هغو هېوادوالو لپاره چې نوي له پاکستان څخه راځي د دندو د زمینې برابرولو په موخه ۸۰ بستونه ځانګړي کړي دي او هغه درانه هېوادوال چې د دې بستونو لپاره ټاکل شوي شرایط پوره کړي په یادو بستونو کې به په دندو وګمارل شي. ښاغلي بدري وویل د وړو پورونو د مؤسسو په طرحې هم کار روان دی چې په بشپړېدو سره به یې نوي راستنېدونکي هېوادوال وکولای شي د کوچنیو کاروبارونو د پیل لپاره له یادو مؤسساتو څخه په آسانه توګه پورونه تر لاسه کړي.
د افغانستان بانک سرپرست رئیس دا هم وویل چې د سوداګریزو بانکونو مشرانو ته یې لارښونه کړې ده چې د نوو راستنېدونکو هېوادوالو لپاره د دندو زمینه برابره کړي او خالي بستونه د دوی لپاره ځانګړي کړي.
د یادونې وړ ده چې ښاغلي بدري له نورو ادارو او بنسټونو هم وغوښتل څو له پاکستان څخه د راستیدونکو هېوادوالو د لاسنیوي لپاره د کاري زمینو برابرولو په برخه کې هلې ځلې جاري وساتي او په دې وسیله درانه هېوادوال د نورو له احتیاجه خلاص کړي.
باید وویل شي چې د افغانستان بانک د خلکو د مالي استازي په توګه، د هېواد د مالي نظام مسئولیت پر غاړه لري. دا بانک ژمن دی چې په هر ډول وضعیت کې د درنو هېوادوالو لاسنیوی وکړي او د دوی لپاره د غوره خدمتونو د وړاند کولو زمینه برابره کړي.
