د افغانستان بانک د ټولو سرپرست رئیس د ختیځ زون ولایتونو له والیانو او امنیتي مسؤلینو او د افغانستان بانک دنمایندگیو له مدیرانو سره ولیدل
۱۴۴۵ شعبان المعظم ۲۳- د افغانستان بانک د ټولو سرپرست رئیس ښاغلي هدايت الله بدري د ننګرهار، لغمان، کونړ او نورستان ولايتونو له واليانو، امنيتي مسؤلينو او ښاروالانو سره ولیدل. د دې لیدنې موخه د مالي سکتور پیاوړتیا، د اسلامي بانکوالۍ پراختیا، د افغانۍ ترویج او خلکو ته د مالي خدمتونو د وړاندې کولو په برخه کې د امارتي ادارو ترمنځ د ګډو هڅو او همکاریو روحیه رامنځته کول وو.
ښاغلي بدري د ختیځ زون له محترمو واليانو او د یادو ولایتونو له امنیتي مسؤلینو څخه وغوښتل چې په خپل وار د ملي پروسو په ځانګړي ډول د افغانۍ د ترویج په برخه کې خلکو ته د پوهاوي برابرولو او د ولس ملاتړ په ترلاسه کولو کې هڅې وکړي او د افغانستان بانک ته د همکارۍ لاس ورکړي.
نوموړي همدارنګه له هېواد څخه بهر ته د ډالرو د قاچاق د مخنیوي په برخه ټینګار وکړ او په دې برخه کې یې د اړوندو ادارو د همکارۍ غوښتنه وکړه. ورپسې د ادارو تر منځ د همکاریو د کچې په هکله د خبرو اترو او بحثونو لپاره زمینه برابره شوه او د ختیځ زون د ولایتونو والیانو او امنیتي مسؤلینو په خپل وار د افغانستان بانک سره د همکارۍ په برخه کې د چمتووالي څرګندونې وکړې.
