د ریاست الوزراء کفیل او سیاسي مرستیال د افغانستان بانک له عمومي رئیس سره ولیدل
![د ریاست الوزراء کفیل او سیاسي مرستیال د افغانستان بانک له عمومي رئیس سره ولیدل](/sites/default/files/2023-06/1this_is_for_site.jpg)
د رياست الوزراء کفیل او سیاسي مرستیال (دوشنبه، د غبرګولي ۲۲ مه) د افغانستان بانک له عمومي رئیس ښاغلي هدایت الله بدري سره وکتل.
په دې لیدنه کې ښاغلي هدایت الله بدري د افغانستان بانک د وروستیو لاسته راوړنو او فعالیتونو په اړه د ریاست الوزراء کفیل ته معلومات ورکړل او ویې ویل، چې د افغانۍ ارزښت ساتلو لپاره مهم ګامونه اخیستل شوي او په بازارونو کې د زړو بانکنوټونو ستونزې هم هوارې شوې دي.
د ښاغلي بدري په خبره، له معتبرو نړیوالو کمپنیو سره د بانکنوټونو د چاپ نوي تړونونه امضاء شوي چې په لوړ کیفیت به افغانۍ چاپ کړي.
هغه زیاته کړه، د افغانستان بانک ګومارنې او کړنې له نړیوالو معیارونو سره سمې روانې دي چې له همدې امله د افغانستان بانک په ښه وضعیت کې دی.
نوموړي زیاته کړه، چې د شخصي بانکونو چارې هم پر ښه لوري روانې دي او د خلکو باور پرې زیات شوی دی.
د ریاست الوزراء کفیل او سیاسي مرستیال محترم مولوي عبدالکبیر، د افغانۍ ارزښت ساتلو له امله د افغانستان بانک د مسوولینو هڅې وستایلې او ویې ویل، چې د افغانۍ ارزښت ساتلو برخه مو کاري لومړیتوب وګرځوئ او همداشان پولي سیاستونه له میعارونو سره سم په تخصصي ډول مخکې بوځئ.
محترم مولوي عبدالکبیر زیاته کړه، چې په هېواد کې د اسلامي بانکدارۍ پراختیا او وده اړینه اړتیا ده چې باید ډېر پام ورته وشي.