د افغانستان بانک د بانکي سکتور د ستونزو د حل په موخه د افغانستان په چارو کې د امریکا د ځانګړي استازي د وروستیو څرګندونو هرکلی کوي
د افغانستان لپاره د امریکا د متحده ایالاتو ځانګړي استازي تام وسټ په متحده عربي اماراتو کې د هېواد له یو شمېر سوداګرو سره د لیدلو پر مهال ویلي دي چې د افغانستان د بانکي نظام پر وړاندې شته ننګونې به ډېر ژر حل کړو.
د افغانستان بانک د ډېرو محدودیتونو د له منځه وړلو او د افغانستان د بانکي سکتور پر وړاندې د ستونزو د حل په تړاو د ښاغلي وسټ د دې نیک اقدام او ښه نیت درناوی کوي او له نړیوالې ټولنې په ځانګړې توګه د امریکا متحده ایالاتو څخه غواړي څو له افغانستان سره په نورو برخو کې هم د رغنده تعامل لاره غوره کړي، څو یو ځل بیا د افغانستان او نورو هېوادونو ترمنځ اغیزناکه اړیکې پیل شي.
د افغانستان بانک د بانکي سکتور د څاروونکي او قانون جوړوونکي په توګه یو ځل بیا خلکو ته ډاډ ورکوي چې د هېواد د بانکي سکتور پر وړاندې ننګونې او ستونزې به له هرې ممکنې لارې له داخلي او بهرنیو شریکانو سره شریکې کړي او په خپل وار د بانکي سکتور او د هېواد په اقتصادي وده او پراختیا کې د هغه د ګټور رول د ښه والي ژمنه لري.
