د افغانستان بانک د پیسو له نړیوال صندوق سره ډیری اقتصادي پروګرامونه په بریالیتوب پای ته رسولي
د افغانستان بانک د کریډټ د تمدید د اسانتیا پروګرام (ECF) د زیاتو شرایطو په پوره کولو او د یاد پروګرام د موخو په ترلاسه کولو سره په بریا سره پای ته رسولی او د روان کال د نومبر د میاشتې تر پایه پورې به یې ټول موارد بشپړ کړي.
د افغانستان دولت او د پیسو د نړیوال صندوق ترمنځ په شپږمې او وروستۍ ناسته کې چې د تلې د میاشتې له ۱۱ نېټې څخه تر ۱۸ نېټې پورې د دبۍ په ښار کې په لاره اچول شوی وه، د افغانستان بانک د سرپرست او لومړي مرستیال، واحدالله نوشير په مشرۍ د یاد بانک پلاوي او د کرسټوفر ډوینالډ په مشرۍ د پیسو نړیوال صندوق د کارپوهانو پلاوي ګډون کړی وه.
په یاده ناسته کې چې د تیرو پنځو ناستو په دوام جوړه شوې وه، پر اقتصادي وضعیت او د دې وضعیت د لیدلوري، د بانکي سکتور د وضعیت، د انفلاسیون د نرخ، د اسعارو د مبادلې نرخ، پولي شاخصونو (په ګردښت کې پيسو او پولي زیرمو) او د خالصو اسعاري زیرمو د کچې په اړه تفصیلي او هر اړخیز بحثونه وشول.
د بانکي سکتور د موخو د ترلاسه کولو ترڅنګ، د افغانستان بانک په دې توانیدلی څو د دې پروګرام زیات شمیر مقداري موخې په بریالیتوب سره عملي کړي. په یاده موده کې د انفلاسیون نرخ ټیټ، د مبادلې نرخ د داخلي او سیمه ایزو ستونزو سره سره له نسبي ثبات څخه برخمن او پولي شاخصونه (په ګردښت کې پيسې او پولي زیرمې) د ټاکل شوې کچې څخه ټیټ وه او اسعاري زېرمې نه یواځې دا چې د ټاکل شوې موخې څخه زیاتې دي، بلکه په تیرو اتلسو کلونو کې تر ټولو لوړې کچې ته رسیدلې دي.
د پیسو نړیوال صندوق هیئت په ECF پروګرام کې د افغانستان بانک د کړنو قدرداني وکړه او د افغانستان په سختو او ستونزمنو شرایطو کې د یادو شرایطو په عملي کولو او ټاکل شویو موخو په ترلاسه کولو کې یې یادې کړنې بریالۍ وبللې او څرګنده یې کړه چې د اجرائیوي پلاوي سره له سلا مشورو وروسته به د خپلې انټرنیټي پاڼې له لارې خپل دریځ رسماً اعلان کړي.
تمه کیږي چې د یاد صندوق اجرائیوي پلاوی به د ۲۰۱۹ کال د دسمبر په میاشت کې په دې اړه بحث وکړي او ۵.۳ میلیون SDR چې معادل یې ۷.۴ میلیون امریکایي ډالره کیږي، افغانستان ته ورکړي چې د یاد پروګرام له لارې افغانستان ته د ټولیزو ورکړل شویو پیسو مبلغ به ۳۲.۳۸ میلیون SDR (۴۴.۴ میلیون ډالر) ته ورسیږي.
