په هرات ولایت کې د لوېدیځ زون کارکوونکو سره د افغانستان بانک د لومړي مرستیال لېدنه
۱۴۴۵ کال د ربیع الثاني ۱۵ – د افغانستان بانک لومړي مرستیال، ښاغلي نوراحمد آغا د یو پلاوي په مشرۍ لوېدیځ زون ته سفر وکړ او په هرات ولایت کې یې د افغانستان بانک له کارکوونکو سره لېده کاته وکړل. د افغانستان بانک لومړي مرستیال په یاد ولایت کې د پرلپسې زلزلو پېښېدو له امله خپله ژوره خواشيني وښوده او د کارکوونکو او د هغوی د کورنیو د حال او احوال پوښتنه یې وکړه. ښاغلي نوراحمد آغا د دې ولایت د زلزلې شهېدانو روح ته د دعا ترڅنګ، د دغې پېښې ټپیانو ته د روغتیا هیله وکړه او د افغانستان بانک د لوېدیځ زون له کارکوونکو یې وغوښتل څو په دې حساسو شرایطو کې، د هرات شریفو خلکو ته غوره بانکي خدمتونه وړاندې کړي.
باید یادونه وکړو چې ښاغلي نوراحمد آغا د افغانستان بانک د لوېدیځ زون له آمر سره په ګډه د زون له بېلابیلو برخو او شعبو لېدنه وکړه او کارکوونکو ته یې لازمې سپارښتنې وکړې.
