افغانستان ته څلورمه ډالري د مرستې کڅوړه راورسیده
۱۴۰۰ د لیندۍ ۲۴ مه_ افغانستان ته د بشري مرستو په لړ کې څلورمه کڅوړه چې نولس اعشاریه دوه (۱۹,۲) میلیونه امریکایي ډالر دي ورسیده او د افغانستان نړیوال بانک (AIB) ته وسپارل شوه.
د افغانستان بانک تل هڅه کوي، څو د هېوادوالو د بېوزلۍ او ناچارۍ د مخنیوي لپاره اصولي او آسانه لارې وکاروي او له دې لارې هېوادوالو ته ډاډ ورکوي چې د هېواد د بانکي نظام وضعیت او اسعاري اړتیاوې مخ په ښه کېدو دي.
موږ یو ځل بیا درنو هېوادوالو ته ډاډ ورکوو چې د افغانستان بانک تل هڅه کوي چې د اسعارو پر وړاندې د افغانۍ ارزښت په ثابت حد کې وساتي.
