د افغانستان بانک سرپرست رئیس پر مشرۍ له سویل ختیځ زون لیدنه
۱۴۰۱ وری ۱۰– د افغانستان بانک د زونونو او نمایندګیو څخه د لیدنې او څارنې په لړ کې دا ځل د افغانستان بانک سرپرست رئیس ښاغلي حاجي ادریس او ور سره پلاوي سویل ختیځ زون ته سفر وکړ او د دې زون له نمایندګیو یې لیدنه وکړه. په دې پلاوي کې د افغانستان بانک د ریاست د دفتر لوی آمر ښاغلي صدیق الله خالد هم ګډون درلود.
د دې سفر موخه د سمونونو راتګ، د چارو تنظیم، همغږي، د مدیریتي چارو اغېزناکتیا او د ګروپي کار په وسیله د افغانستان بانک بنسټیزو موخو ته رسېدنه ده.
یاد پلاوي له نمایندګیو څخه تر لیدنې وروسته په جنوب ختیځ زون کې د ټولو نمایندګیو د استازو په ګډون د چارو د لا همغږۍ په موخه غونډه تر سره کړه چې د غونډې په اوږدو کې هر اړخیز بحثونه وشول او د ستونزو د حل په موخه د افغانستان بانک سرپرست رئیس ښاغلي حاجي ادريس اړوندو څانګو ته اړینې لارښوونې وکړې.
د افغانستان بانک سرپرست د سویل ختیځ زون له کارکوونکو څخه و غوښتل چې خلکو ته د غوره خدمتونو د وړاندې کولو په موخه دې په پوره مسئولیت، اخلاص او صداقت سره چارې تر سره کړي.
