د  افغانستان بانک د کارکوونکو لپاره د ترکیې د مشارکتي بانکونو د ټولنې له لوري د روزنیز ورکشاپ پیل

۱۴۴۶ جمادي الثاني ۲۶ مه – د ترکیې د مشارکتي بانکونو ټولنه (Participation Banks Association of Turkey) یوه مسلکي ټولنه ده چې د مشارکتي بانکونو د تنظیم، همغږۍ، او د سود څخه د پاکو مالي خدمتونو د ترویج په موخه فعالیت ترسره کوي.

د دې ټولنې له لوري نن د افغانستان بانک د کارکوونکو د ظرفیت لوړونې په موخه د اسلامي بانکوالۍ د اصولو، د خطر مدیریت، د شریعت پر بنسټ محصولاتو، او نورو اړوندو موضوعاتو په اړه درې ورځنی روزنیز ورکشاپ پیل شو. په دې ورکشاپ کې د ترکیې د مشارکتي بانکونو ټولنې دوه تجربه لرونکي استادان، ښاغلی دکتور صائم کایادبي او دکتور عمر فاروق، د افغانستان بانک کارکوونکو ته روزنه ورکوي.

ورکشاپ د  افغانستان بانک د لومړي مرستیال، ښاغلي صدیق الله خالد، په وینا پرانیستل شو. نوموړي یادونه وکړه چې د افغانستان بانک د خپلو کارکوونکو د ظرفیت لوړونې ته ژمن دی او غواړي د اسلامي بانکوالۍ په برخه کې د نړیوالو تجربو څخه ګټه پورته کړي.

ښاغلي خالد څرګنده کړه چې د افغانستان بانک په بانکي سکتور کې غیر شرعي معاملې ختمې کړي او د یو بشپړ اسلامي بانکي نظام جوړولو ته ژمن دی او اوسمهال ټول بانکي معاملات د حنفي فقهې په رڼا کې، له سود پرته ترسره کېږي.

د ښاغلي خالد په وینا، د مرکزي بانکوالۍ بشپړ اسلامي کېدل یو اوږد مهاله بهیر دی چې  پرله‌پسې هڅو ته اړتیا لري. نوموړي ټینګار وکړ چې د نړیوالو اسلامي هېوادونو تجربې په دې لاره کې د پرمختګ اسانتیا برابروي.

ورکشاپ ته په وینا کې، ښاغلي خالد له ګډونوالو وغوښتل چې د ترکیې هېواد د متخصصینو له تجربو  څخه پوره ګټه واخلي، ترڅو په خپلو عملي چارو کې یې په مؤثر ډول تطبیق کړي.

د یادونې وړ ده چې د افغانستان بانک لومړي مرستیال ښاغلي صدیق الله خالد د ترکیې د مشارکتي بانکونو د ټولنې له استازو سره ځانګړې لیدنه هم وکړه، په دې لیدنه کې یې د اسلامي بانکوالۍ د پراختیا په برخه کې د ترکیې هېواد د مشارکتي بانکونو ټولنې له هلو ځلو او فعالیتونو مننه وکړه او زیاته یې کړه چې د افغانستان بانک غواړي له ټولو نړیوالو مالي او بانکي بنسټونو سره غوره اړیکې ولري او د اسلامي بانکوالۍ د پراختیا په برخه کې د دوی له تجربو ګټه پورته کړي.