د افغانستان بانک خبرتیا!
درنو هېوادوالو:
د مخکنیو خبرتیاوو په تعقیب یو ځل بیا خبر ورکول کېږي چې د اوسنیو شرایطو په پام کې نیولو سره یوازې د افغانۍ هغه بانکنوټونه چې د لاندې ځانګړتیاوو لرونکي وي، د مندرسو بانکنوټونو په ډله کې شمېرل کېږي:
۱- د افغانۍ هغه بانکنوټونه چې ظاهري بڼه یې په بشپړه توګه بدله شوې وي.
۲- د افغانۍ هغه بانکنوټونه چې د نا اټکل شویو پېښو له امله یې یوه برخه تخریب شوې او یا یې ظاهري بڼه بدله شوې وي، خو اصلیت یې د پېژندلو وړ وي او په بازارونو کې د چلښت وړ نه وي او د واټرمارک، ظاهري امنیتي نښو او دواړو لاسلیکونو په ګډون یې له شپېته سلنې زیاته برخه موجوده وي.
د مندرسو بانکنوټونو بېلګې
د افغانۍ نور بانکنوټونه چې پورته ذکر شوې ځانګړنې ونلري په روغو بانکنوټونو کې حسابېږي او په پولي راکړو ورکړو کې د کارونې وړ دي.
