د افغانستان بانک د بانکي سکتور ټینګښت ته ژمن دی
۱۴۴۴ ربیع الثاني ۸ مه – د افغانستان بانک د بانکي سکتور د پیاوړتیا لپاره د خپلو هڅو پر دوام په هرات، کندهار، زابل او ننګرهار ولایتونو کې د دې ولایتونو له چارواکو، سوداګریزو بانکونو له استازو، اصنافو، سوداګرو او قومي مشرانو سره د بانکي نظام د پیاوړتیا او پر دې نظام د باور جوړونې په موخه جلا جلا غونډې جوړې کړې.
په یادو غونډو کې د بانکي نظام او په اقتصادي وده کې د دې سکتور د ارزښت په اړه هر اړخیز بحثونه وشول او د غونډې له ګډونوالو وغوښتل شول، تر څو د هېواد د اقتصادي ودې لپاره له بانکي نظام ملاتړ وکړي. د غونډې ګډونوالو د هېواد له مالي او بانکي چارو د خپل ملاتړ د اعلان تر څنګ د هر ډول همکاریو ژمنه وکړه.
د یادونې وړ ده چې د مالي او بانکي سیستم پیاوړتیا او ثبات د افغانستان بانک له ملي او نړیوالو شریکانو سره د ژمنو یوه برخه ده چې پدې برخه کې زمونږ هلې ځلې دوام لري او دا لړۍ به د هېواد نورو ولایتونو ته هم و غځېږي.
