د پیسو د نړیوال صندوق له لوی رئیس سره د افغانستان د پلاوي لیدنه
![د پیسو د نړیوال صندوق له لوی رئیس سره د افغانستان د پلاوي لیدنه](/sites/default/files/2019-10/111.jpg)
د افغانستان بانک سرپرست او لومړي مرستیال ښاغلي واحد الله نوشېر او د مالیې وزیر او په بخبنسټیزو چارو کې د ولسمشر لوی سلاکار ښاغلي همایون قیومي او ورسره پلاوي د پیسو د نړیوال صندوق له لوی رئیس اغلې کریستالینا ګورګیوا سره د امریکې د متحدو ایالتونو په واشنګټن ښار کې ولیدل.
په دې لیدنه کې په واشنګټن کې د افغانستان سفیرې اغلې رویا رحماني هم ګډون درلوده، د پیسو د نړیوال صندوق لوی رئیس د افغانستان د اقتصادي نظام د ټیکاو او د سمونونو د پرمختګ په برخه کې د افغانستان لاسته راوړنې وستایلې او د مالي نظام د سمون او د بانکي نظام د ټینګښت په برخه کې د افغانستان د ژمنو د پلي کیدو لپاره د افغانستان بانک او د افغانستان د اسلامي جمهوریت د مالیې وزارت له کړنو څخه د خوښۍ څرګندونه وکړه.
د افغانستان پلاوي د پیسو د نړیوال صندوق د ریاست په پُست کې د اغلې ګرګیوا د مقرریدو په ویاړ د افغانستان د ولسمشر د مبارکۍ پیغام ولوسته او د اقتصادي وضعیت د ښه والي، په تولیدي اقتصاد د لګښتي اقتصاد د بدلیدو، د صادراتو د پیاوړتیا، د مالي ځان بسیاینې د تأمینولو او د ښځو او ځوانانو د رول او ګډون د پراختیا په برخه کې د افغانستان دولت اقدامات او پروګرامونه په تفصیل سره روښانه کړل.
د افغانستان بانک سرپرست او لومړي مرستیال ښاغلي واحد الله نوشېر د پرمختګ په حال کې او لږ پرمختللو هېوادونو د اقتصادي وضعیت په اړه د اغلې ګرګیوا شخصي پیژندنې او تجربې ته په اشارې سره په یاد پُِست کې د هغې ټاکنه پر ځای وبلله او د اقتصادي او مالي سیاستونو او په افغانستان کې د سمونونو په برخه کې د پیسو د نړیوال صندوق ملاتړ یې مهم او اغیزناکه په ګوته کړ.
ښاغلي نوشېر د افغانستان او صندوق په ځانګړې توګه په افغانستان کې د صندوق د استازي د شتون له لارې د اړیکو په پیاوړتیا ټینګار وکړ.
د افغانستان پلاوي د افغانستان او صندوق ترمنځ ګډ پروګرام ته چې په نږدې راتلونکي کې به بشپړ شي په اشارې سره د اوسني پروګرام له بشپړیدو وروسته د بل پروګرام پیلدو ته د افغانستان بشپړه لېوالتیا او چمتوالی وښوده او د اقتصادي ودې د ارزښت او د بې وزلۍ او بیکارۍ پر وړاندې د مبارزې په اړه د ورته پروګرام په جوړیدو یې ټینګار وکړ او د فساد پر وړاندې د مبارزې په برخه کې یې د افغانستان د کلک هوډ ډاډ ورکړ.