په بلخ ولسوالۍ کې د شمال او شمال ختیځ زونونو راټول شوي زاړه بانکنوټونه وسوځول شول
۱۴۴۵ د جمادی الاول ۱۳ - د افغانستان بانک لومړی مرستیال ښاغلی نور احمد آغا بلخ ولایت ته د خپل سفر په دویمه ورځ د یاد ولایت بلخ ولسوالۍ ته ولاړ. د دې سفر موخه په راکړو ورکړو کې د آسانتیاوو رامنځته کولو په پار په بلخ ولسوالۍ کې د زړو بانکنوټونو سوځول وو چې د افغانستان بانک د قانون د ۳۹ او ۴۲ مادو او اړوندې کړنلارې سره سم د ښاغلي نور احمد آغا په مشرۍ د ۵۳۸۳۹۱۰۰۰ افغانیو په ارزښت د شمال او شمال ختیځ زونونو راټول شوي زاړه بانکنوټونه د ګمارل شوي پلاوي تر څارنې لاندې له کره شمېرنې او کنټرول وروسته وسوځول شول. په دې بانکنوټونو کې د (۱۰۰۰،۵۰۰،۱۰۰،۵۰،۱۰،۵،۲،۱) افغانۍ انواعیې شاملې وې.
د افغانستان بانک لومړي مرستیال ښاغلي نور احمد آغا وویل چې دا مندرس بانکنوټونه په بشپړه توګه زاړه او د چلښت وړ نه وو او اړتیا وه ترڅو وسوځول شي ځکه چې د پیسو شمېرنې په ماشینونو کې د شمېرلو جوګه نه وو او د راکړو ورکړو پرمهال یې د هېوادوالو په وړو او لویو معاملو کې ستونزې رامنځته کولې.
ښاغلي نور احمد آغا د خپلو خبرو په بله برخه کې وویل چې افغانۍ زموږ ملي پیسې او ملي هویت دی او له هېوادوالو څخه یې وغوښتل چې افغاني بانکنوټونه په غوره توګه وساتي او د ژر خرابېدو څخه یې مخنیوی وکړي.
باید وویل شي چې په دې پروسه کې د شمال زون آمر ښاغلي ضیا الرحمن مدني او د شمال ختیځ زون آمر ښاغلي عبدالولي حماد هم ګډون درلود.
د یادونې وړ ده چې د افغانستان بانک په راکړو ورکړو کې د آسانتیاوو رامنځته کولو په موخه وخت په وخت د افغانۍ زاړه بانکنوټونه له بازار څخه راټولوي او په بدل کې یې هېوادوالو ته نوي بانکنوټه وېشي او د قوانینو او مقرراتو په رڼا کې مندرس بانکنوټونه سوځوي.
