د بریښنایي اداینې د سیستم د طرحې د پراختیا په اړه عامه پوهاوی
د ۱۳۹۷ کال د مرغومې ۱۲ مه – د افغانستان بانک، مالیې وزارت، سوداګریزو خونو استازو له ګڼ شمېر سوداګرو سره د بریښنایي اداینې د سیستم د طرحې د پراختیا په اړه د افغانستان بانک په مرکزي دفتر کې د عامه پوهاوۍ ښوونیز ورکشاپ په لاره واچوه.
د افغانستان بانک دویم مرستیال ښاغلي محمد قسیم رحیمي د بریښنایي اداینې سیستم د طرحې د پراختیا د عامه پوهاوۍ ښوونیز ورکشاپ موخه هم د اداینې سیستم پرمختګ وباله او زیاته یې کړه چې د بریښنایي اداینې سیستم په د افغانستان بانک کې له څو کلونو راهیسې فعال دی، خو وروسته له دې به دا چارې د سوداګریز بانکونو له لارې هم ترسره شي او سوداګرو ته به آسانتیاوې رامنځته کړي چې د افغانستان له ګوټ ګوټ څخه د بانکونو په څانګو کې خپل سوداګریز مالیات تحویل کړي.
د بریښنايي اداینې سیستم د طرحې پراختیا موخه اغیزمن بانکي خدمتونه، خوندیتوب، په مالي معاملاتو کې آسانتیاوې رامنځته کول، ګواښونو کمول، پرته له کوم جغرافیایي خنډ څخه د دولت د عوایدو راټولول، د خلکو ترمنځ د بانکدارۍ دودول، د غیر نقدي معاملاتو دودول او د بانکنوټونو له زړیدو څخه مخنیوی دی.
د افغانستان بانک هڅه کوي چې سوداګر خپل ګمرکې اداینې په خوندیتوب او سرعت سره د بریښنایي سیستم له لارې ترسره کړي، څو له اداري فساد، پیسو وینځلو او ترهګرۍ له تمویل څخه مخنیوی وشي.
دیادونې وړ ده چې د عامه پوهاوي ورکشاپ کې د مالیې وزارت، د سوداګرۍ خونو استازو، د بانکونو د ټولنې مشر او د افغانستان بانک د بېلابېلو آمریتونو یو شمېر آمرینو او ګڼ شمېرسوداګرو هم ګډون کړی وو.
