د بانکي نظام د ټینګښت لپاره د افغانستان بانک د هلو ځلو په دوام په نیمروز او فراه ولایتونو کې غونډې جوړې شوې

په نیمروز او فراه ولایتونو کې د بانکي نظام د ټینګښت په تړاو د دې ولایتونو  د سوداګرو، د سوداګریزو بانکونو استازو، اصنافو او قومي مخورو او مشرانو په ګډون غونډې جوړې شوې.

په یادو غونډو کې په بانکي سکتور کې د خلکو په ونډې اخیستلو او د هېواد په اقتصادي وده کې د بانکي سکتور پر ارزښت هر اړخیزې خبرې وشوې، د غونډې ګډونوالو د هېواد له بانکي سکتور څخه خپل ملاتړ اعلان کړ.

د افغانستان بانک تل هڅه کوي چې د بانکي سکتور د پیاوړتیا لپاره کار وکړي او د خلکو لپاره په دې سکتور کې اړینې اسانتیاوې رامنځته کړي.