د بانکي سکتور بیا رغونه د افغانستان بانک د اجنډا په سر کې ځای لري
دې ته په پام سره چې سوداګریز بانکونه د اړینو بانکي اسانتیاوو او د هېواد په اقتصادي رغښت کې د ارزښت وړ رول لري، د افغانستان بانک په هېواد کې تر سیاسي بدلون وروسته د سوداګریزو بانکونو د فعالیتونو د دوام، د نقدینګۍ د مدیریت او د پېرودونکو د پیسو د اداینې، د لومړنیو اړینو توکو او خدمتونو د وړاندې کولو لپاره له پولو هاخوا د لېږد اسانتیا او د هیوادوالو لپاره د بانکي خدمتونو د وړاندې کولو په برخه کې نه ستړي کیدونکي هلې ځلې کړې دي.
د همدغو هڅو په لړ کې په ولایتونو کې د اصنافو، سوداګرو، سیمهییزو مشرانو او مخورو د همکارۍ د جلبولو لپاره یوه طرحه تر لاس لاندې نیول شوې، ترڅو د بانکي سکتور د پیاوړتیا لپاره په ګډه کار وکړو.
د دغه طرحې د تطبیق په لړ کې د پروان، میدان وردګو او لوګر ولایتونو له چارواکو، د سوداګریزو بانکونو له استازو او سیمه ییزو مخورو مشرانو سره جلا جلا ناستې تر سره شوې دي چې د هېواد له مالي او بانکي چارو یې خپل ملاتړ اعلان کړی دی. دا لړۍ به د هېواد په نورو ولایتونو کې هم دوام وکړي.
د یادونې وړ ده چې د مالي او بانکي سیستم پیاوړتیا او ثبات د افغانستان بانک له ملي او نړیوالو شریکانو سره د ژمنو یوه برخه ده چې موږ په دې برخه کې نه ستړې کېدونکې هلې ځلې کوو.
