ملت ته د حساب ورکولو برنامه کې د افغانستان بانک د غوره کړنو او فعالې ونډې اخیستنې له کبله د افغانستان بانک مشرتابه ته د ستاینلیک ورکړه
۱۴۴۴ ربیع الاول ۱ – د افغانستان بانک سرپرست رئیس ښاغلي عبدالقاهر ( حاجي ادریس) ته ملت ته د حساب ورکولو برنامه کې د افغانستان بانک غوره کړنو او د فعالې ونډې اخیستنې له کبله د ریاست الوزرا د اقتصادي معاونیت لخوا ستاینلیک ورکړل شو.
په هغه غونډه کې چې ملت ته د حساب ورکولو برنامه کې د دولتي ادارو او رسنیو د غوره کړنو او فعالې ونډې اخیستنې د ستاینې په موخه جوړه شوې وه، ۴۳ دولتي ادارو ته د ریاست الوزرا د محترم مقام لخوا ستاینلیکونه ورکړل شول او د دوی له غوره اجراآتو او فعالې ونډې اخیستنې مننه وشوه.
د یادونې وړ ده چې د افغانستان بانک روڼتیا او حساب ورکولو ته ژمن دی او په همدې موخه یې په تېر یو کال کې له رسنیو سره غوره اړیکې پاللې دي او په تېر یو کال کې یې غوره لاسته راوړنې درلودې چې د فعالیتونو او لاسته راوړنو بشپړ راپور یې د روان ۱۴۴۴ کال د محرم الحرام د میاشتې په ۱۳ مه نېټه د حکومت د رسنیو په مرکز کې له خلکو سره شریک کړل شوی دی.
د افغانستان بانک مشرتابه پلاوی د ریاست الوزرا له درانه مقام څخه د مننې تر څنګ ژمنه کوي چې پدې برخه کې به لا ډېرې هڅې کوي او خلکو ته د خدمت په موخه به د بانکوالۍ سکتور په برخه کې لا ډېرې اسانتیاوې رامنځته کړي.
