د افغانستان بانک د ټولو سرپرست رئیس د صرافانو ټولنې له استازو سره ولیدل
د ۱۴۴۶ د شوال المکرم ۲۵ مه – د افغانستان بانک د ټولو سرپرست رئیس ښاغلي نوراحمد آغا په خپل کاري دفتر کې د صرافانو ټولنې له رئیس ښاغلي بهرام خان ځدران او مل پلاوي سره ولیدل.
د غونډې په پيل کې د صرافانو او پولي خدمتونو د وړاندې کوونکو ستونزې واوریدل شوې. د افغانستان بانک د ټولو سرپرست رئیس ښاغلي نور احمد آغا وویل چې د افغانستان بانک ژمن دی، ترڅو په غیربانکي سکتور کې د صرافانو او پولي خدمتونو وړاندې کوونکو ستونزو ته د افغانستان بانک د پالیسیو او مقرراتو په چوکاټ کې رسیدنه وکړي. همداراز ښاغلي نور احمد آغا هېوادوالو ته د معیاري او خوندي خدماتو پر وړاندې کولو ټینګار وکړ او له صرافانو څخه یې وغوښتل چې د افغانستان بانک د مقرراتو په رڼا کې او د ملي ګټو په پام کې نیولو سره خپلو فعالیتونو ته دوام ورکړي.
ښاغلي نور احمد آغا زیاته کړه چې د افغانستان بانک د افغانۍ د ثبات ساتلو او په هېواد کې د پيسو وینځلو او د اسعارو د قاچاق د مخنیوي په برخه کې ګټورې هلې ځلې کړي او د صرافانو او پولي خدمتونو وړاندې کوونکو د فعالیتونو د میکانیزه کولو په موخه یې کاري چوکاټ رامنځته کړی دی چې تر دې دمه په مؤثره توګه پلی شوی دی.
ښاغلي نور احمد آغا وویل چې د افغانستان بانک ژمن دی ترڅو په دې برخه کې خپلې هڅې جاري وساتي.
د یادونې وړ ده چې په دې غونډه کې د صرافانو د ستونزو د آوریدو ترڅنګ د اسعارو په مقابل کې د افغانۍ د ثبات او اړوندو مسائلو په اړه خبرې اترې هم وشوې او د صرافانو ټولنې استازو هم له خپله اړخه د پوره همکارۍ ډاډ ورکړ او په دې برخه کې یې د افغانستان بانک د لارښوونو او پالیسیو د پلي کولو په برخه کې د افغانستان بانک سره د همکارۍ ژمنه وکړه.
