د افغانستان بانک له شمال او شمال ختیځ زونونو څخه راټول شوي مندرس بانکنوټونه وسوځول
د ۱۴۴۸ کال د محرم الحرام ۲۹- د افغانستان بانک په راکړو ورکړو کې د آسانتیاوو رامنځته کولو په موخه له شمال او شمال ختیځ زونونو څخه راټول شوي د ۱،۱۴۱،۶۶۰،۰۰۰ (یو میلیارد او یو سل و یو څلویښت میلیونه او شپږ سوه شپیته زره) افغانیو په ارزښت د افغانۍ زاړه بانکنوټونه د افغانستان بانک دویم مرستیال ښاغلي ملا محمد آخند په مشرۍ د ګمارل شوي پلاوي تر څارنې لاندې له کره شمېرنې او کنټرول څخه وروسته وسوځول. په دې بانکنوټونو کې د (۱۰، ۲۰، ۵۰، ۱۰۰، ۵۰۰، ۱۰۰۰) افغانۍ انواعیې شاملې وې چې د بلخ ولایت په بلخ ولسوالۍ کې په ځانګړې بټۍ کې وسوځول شول.
د افغانستان بانک دویم مرستیال ښاغلي ملا محمد آخند وویل چې د افغانستان بانک د هېواد د بانکي او مالي سکتور پیاوړتیا ته ژمن دی او تل هڅه کوي چې هېوادوالو ته د معیاري، آسانه او شفافو بانکي خدمتونه وړاندې او په ورځینیو معاملو کې ورته آسانتیا رامنځته کړي. نو له همدې امله د شمال او شمال ختیځ زونونو څخه راټول شوي زاړه بانکنوټونه له ګردښت څخه وایستل شول ترڅو ګران هېوادوال وکولای شي خپلې مالي راکړې ورکړې پرته له کوم ځنډ او خنډ ترسره کړي.
ښاغلي ملا محمد آخند د افغانۍ د ژر زړیدو څخه د مخنیوي په برخه کې زیاته کړه چې دا د هېوادوالو مسئولیت دی ترڅو د افغاني بانکنوټونو څخه په ښه توګه ساتنه وکړي او د کارولو پر مهال یې له احتیاط څخه کار واخلي ترڅو ژر زاړه نشي.
د یادونې وړ ده چې دا بانکنوټونه د عدلیې او مالیې وزارتونو او د امنیتي ادارو د استازو په شتون کې له بارولو وروسته د ټاکل شوي پلاوي لخوا مخصوصو بټیو ته انتقال او په یو وار وسوځول شول.
