په هېواد کې د اسلامي بانکوالۍ د پیاوړتیا او پراختیا په موخه د یو ورځني ګفتمان جوړېدل
۱۴۴۴ رجب المرجب ۶ مه – په هېواد کې د اسلامي بانکوالۍ د پیاوړتیا، پراختیا او مالي خدمتونو ته د خلکو د لاسرسي لپاره مناسبو زمینو برابرولو په موخه د افغانستان بانک د عالي شورا په تالار کې یو ورځنۍ ګفتمان جوړ شو.
پدې غونډه کې د افغانستان بانک د ریاست د دفتر لوی آمر ښاغلي صدیق الله خالد، د افغانستان بانک د اسلامي بانکوالۍ آمریت لوی آمر ښاغلي دوکتور یوسف سلیم، د افغانستان بانک د پالیسۍ ستر سلاکار ښاغلي لطف الحق نور پسرلي، د افغانستان بانک د شرعي نظارتي بورډ غړو دوکتور فضل الرحیم بصیرت او مفتي احسان الله، د افغان ملي بانک د شرعي بورډ غړي تاج ګل حقمل، د افغانستان نړیوال بانک د شرعي بورډ غړو ذوالفقار او رحمن الله شهاب، د افغان یونایټیډ بانک د شرعي بورډ غړي محمد حسین روحاني، د اسلامي بانکي د شرعي بورډ غړي محب الله شریف، د کوچنیو پورونو لومړني بانک د شرعي بورډ غړي عبیدالله عبید او د غضنفر بانک د شرعي بورډ غړي ښاغلي عبدالولي بصیرت، د مشعل پوهنتون رئیس ښاغلي فتح الله بابکر خیل، د باختر پوهنتون د اقتصاد پوهنځي رئیس ښاغلي محمد شاکر ابراهيمي او د جهان پوهنتون د اقتصاد پوهنځي رئیس حنیف الله بشار ګډون درلود.
د دې ګفتمان په پرانیستونکې وینا کې د افغانستان بانک د ریاست د دفتر لوی آمر ښاغلي صدیق الله خالد د دې ګفتمان د جوړېدو موخه په تېر یو نیم کال کې د اسلامي بانکوالۍ په برخه کې رامنځته شوي پرمختګونه، مالي او بانکي خدمتونو ته د خلکو لاسرسی او د راتلونکو فرصتونو په اړه له ګډونوالو سره د سلا مشورو شریکول یاد کړل.
د افغانستان بانک د ریاست د دفتر لوی آمر وویل لله الحمد اسلامي بانکوالي د پراختیا په حال کې ده او هلې ځلې روانې دي چې دا برخه لا ډېره وده وکړي. د افغانستان بانک د اسلامي بانکوالۍ د لا ټینګښت او پراختیا په موخه د علومو اکاډمۍ کې د بانکوالۍ د څېړنیز مرکز سره هم د اړوندو موضوعاتو په اړه بېلابېلې غونډې تر سره کړې دي او د د افغانستان بانک د شرعي نظارت هیئت په غړو کې زیاتوالی راغلی دی چې غونډې یې هم د پخوا په پرتله ډېرې شوې دي د نوموړي په خبره دا د دې ښکارونه کوي چې د افغانستان بانک او په ټول کې د افغانستان اسلامي امارت د اسلامي بانکوالۍ پراختیا ته ژمن دی.
ښاغلي صدیق الله خالد همدارنګه زیاته کړه چې پدې سربیره د اسلامي بانکوالۍ د ترویج او د اسلامي هېوادونو د تجربو څخه د ګټې اخیستنې په موخه په بحرین هېواد کې د اسلامي مالي ادارو د محاسبې او تفتیش د نړیوالې مؤسسې سره د هوکړه لیک د لاسلیک اړونده کارونه هم وروستي شوي دي چې په هیواد کې د اسلامي بانکوالۍ د لا پیاوړتیا لپاره د نورو اسلامي ملکونو د تجربو تر څنګ به د دې نړیوالې مؤسسې له معیارانو او مالي محصولاتو څخه هم استفاده وکړو.
د دې ګفتمان په اوږدو کې د افغانستان بانک د اسلامي بانکوالۍ لوی آمر ښاغلي دوکتور یوسف سلیم په هېواد کې د اسلامي بانکوالۍ په برخه کې د رامنځته شوو پرمختګونو په اړه معلومات شریک کړل او یادونه یې وکړه چې د افغانستان بانک د اسلامي بانکوالۍ لوی آمریت ژمن دی چې د ټول هېواد په کچه به د اسلامي بانکوالۍ د پراختیا لپاره کار وکړي او مالي او بانکي خدمتونو ته به د خلکو لاسرسی زیاتوي. نوموړي زیاته کړه چې د بانکي چارو سربیره، د مالیې د محترم وزارت سره د صکوکو د قانون د تدوین په اړه له تیرو څو میاشتو راهیسې منظمې جلسې درلودې چې د یاد قانون ابتدائي مسوده نهایي شوې او د مالیي د وزارت او د افغانستان بانک له اړوندو ادارو سره د هغوی د بیا کتنې لپاره شریکه شوې ده.
د یادونې وړ ده چې د دې ګفتمان په لړ کې د غونډې د ګډونوالو تر منځ د نظرونه، تجربې او ګټورې مشورې شریکې شوې.
