د سوداګریزو بانکونو له استازو سره د اسلامي بانکوالۍ د پراختیا په اړه غونډه
![د سوداګریزو بانکونو له استازو سره د اسلامي بانکوالۍ د پراختیا په اړه غونډه](/sites/default/files/2022-02/1_0.jpg)
۱۴۰۰ د سلواغې ۱۷ مه– د افغانستان بانک د دویم مرستیال ښاغلي عبدالقدیر احمد پر مشرۍ په هېواد کې د اسلامي بانکوالۍ د پراختیا غونډه جوړه شوه.
په یاده غونډه کې ښاغلي عبدالقدیر احمد وویل چې د افغانستان بانک په هېواد کې د اسلامي بانکوالۍ پراختیا ته ژمن دی او کولای شي د دې برخې د پراختیا لپاره د سوداګریزو بانکونو لپاره اړینې آسانتیاوې رامنځته کړي. نوموړي د افغانستان بانک سره په دې برخه کې د سوداګریزو بانکونو همکاري هم د ارزښت وړ یاده کړه.
د دې غونډې په اوږدو کې د افغانستان د علومو اکاډمۍ د اسلامي بانکوالۍ د څېړنې مرکز مشر ښاغلي مفتي ابو سعید راشد د اسلامي بانکوالۍ پر ارزښت خبرې وکړې او د دې بانکوالۍ پراختیا یې د هېواد او خلکو په ګټه یاده کړه. نوموړي زیاته کړه د اسلامي بانکوالۍ د څېړنې مرکز د نظام او بانکونو تر منځ د پُل حیثیت لري او غواړي چې له دې لارې په هېواد کې د اسلامي بانکوالۍ د ودې او پراختیا لپاره کار وکړي.
په دې غونډه کې د افغانستان د بانکونو ټولنې مشرتابه او د سوداګریزو بانکونو استازو په هېواد کې د اسلامي بانکوالۍ د پراختیا په اړه د همکارۍ ژمنه وکړه او په دې اړه یې خپلې ستونزې او وړاندېزونه د غونډې له ګډونوالو سره شریک کړل.
د یادونې وړ ده چې په دې غونډه کې د افغانستان بانک د دویم مرستیال، د افغانستان د علومو اکاډمۍ د اسلامي بانکوالۍ د څېړنې مرکز د مشر سربېره د افغانستان د بانکونو ټولنې او سوداګریزو بانکونو استازو او د افغانستان بانک د یو شمېر آمریتونو کارکوونکو هم ګډون کړی وو.