د ایکو د سوداګرۍ او پراختیا بانک (ETDB) د مدیره پلاوي د څلور نوي یمې غونډې جوړیدل
د ایکو د سوداګرۍ او پراختیا بانک (ETDB) د مدیره پلاوي څلور نوي یمه غونډه د ۱۴۴۳ کال د ذوالقعدې په ۲۱ (۱۴۰۱/۰۳/۳۰) نېټه په انلاین ډول ترسره شوه. په دې غونډه کې د ایکو د سوداګرۍ او پراختیا بانک د رئیس او د هغه د مدیره پلاوي غړو ګډون درلوده.
په دې غونډه کې لومړی د مدیره پلاوي د غړو لخوا مخکینۍ صورت جلسه تصویب شوه او وروسته د یاد بانک مالي راپورونه او د ۲۰۲۱ کال کلنی راپور د مدیره پلاوي لخوا د تائید وړ وګرځېدل.
ورپسې د پاکستان یو شمېر مالي ادارو ته د پور ټاکلې کچه (حد) تر بیاکتنې لاندې ونیول شو او د غړي هېواد ایران یو شمېر بېخبنسټیزو پروژو ته د ایکو بانک د پورونو د بېرته اداینې راپور وړاندې شو.
په پای کې، له اجنډا سره سم د دې بانک د یو شمېر مقررو او پالیسیو د تصویب او تعدیل په اړه بحث او اړینې پرېکړې وشوې.
د یادونې وړ ده چې دا بانک په سیمه کې د سوداګرۍ د پراختیا لپاره د مالي او اعتباري اسانتیاوو د رامنځ ته کولو، دودولو او وړاندې کولو او همدا ډول د ایکو سازمان د مجموعې تر چتر لاندې د غړو هېوادونو د اقتصادي پراختیا د چټکتیا په موخه تأسیس شوی، چې مرکز یې د ترکیې په استانبول ښار کې دی. افغانستان هم په ۲۰۱۴ زیږدیز کال کې د دې بانک غړیتوب ترلاسه کړی او د یاد بانک په غونډو کې په منظمه توګه ګډون کوي.
د افغانستان بانک تل هڅه کړې څو له نړیوالو او سیمه ایزو مالي سازمانونو سره د خپلو اړیکو د تأمینولو او ښه والي په برخه کې فعاله ونډه ولري او د بانکي او مالي اسانتیاوو د برابرولو په برخه کې د پام وړ رول ولوبوي.
