د افغانستان بانک د شریعه بورډ غونډه
کابل، ۱۳۹۸ کال د لړم ۲۹ مه – د افغانستان بانک د سرپرست او لومړي مرستیال ښاغلي واحدالله نوشېر په مشرۍ د دې بانک د شریعه بورډ او د اسلامي بانکدارۍ او مالي خدمتونو د لوی آمریت له استازو سره معلوماتي غونډه جوړه شوه.
په دې غونډه کې د صکوکو او یو شمېر نورو اړوندو موضوعګانو په اړه هر اړخیز بحثونه وشول او د اسلامي بانکدارۍ او مالي خدمتونو د آمریت د استازو له لوري په دې برخه کې د رامنځته شویو پرمختګونو په اړه د غونډې ګډونوالو ته معلومات ورکړل شول.
په یاده غونډه کې د افغانستان بانک سرپرست او لومړي مرستیال د اسلامي بانکدارۍ او مالي خدمتونو د رامنځته کولو په برخه کې د افغانستان بانک مشرتابه د هر ډول مرستې ژمنه وکړه او د قانون په رڼا کې یې د دې ډول خدمتونو په لا پراختیا ټینګار وکړ.
باید وویل شي چې په همدې غونډه کې د افغانستان بانک د شریعه بورډ د ریاست لپاره رایه اچونه هم وشوه چې په پایله کې یې ښاغلی ډاکتر فضل الرحیم بصیرت د درېیو کلونو لپاره د همدې بورډ د رئیس په توګه وټاکل شو.
د دې بورډ د ریاست لپاره په هرو درېیو کلونو کې یو ځل خپل منځي ټاکنې ترسره کېږي.
