د افغانۍ د لا دودیدو لپاره د لوړ پوړو ولایتي چارواکو هڅې
د افغانستان بانک د شمال زون مسوولینو د ۱۳۹۸ هجري لمریز کال لپاره د افغانۍ د دودولو د طرحې د ګټو پر بنسټ د ۱۳۹۸ هجري لمریز کال د لړم د میاشتې په ۴ او ۷ نېټې د بلخ له لوړ پوړو ولایتې چارواکو، د ولایتې شورا او د یاد ولایت د پوهنې او د حج او اوقافو د ریاستونو له مسوولینو سره ولیدل او د داخلي راکړو ورکړو پر مهال یې د افغانۍ د تبلیغ او دودولو او د هغه د ژر زړیدو د مخنیوی د څرنګوالي په اړه خبرې وکړې.
په دې لیدنو کې لومړی ښاغلي محمد اسرار پویا د شمال زون مرستیال او سرپرست په ټولو سوداګریزو معاملو کې د افغانۍ د کارولو په ارزښت خبرې وکړې او د افغانۍ بانکنوټونو د ژر زړیدلو د مخنیوۍ په برخه کې یې ګډونوالو ته معلومات وړاندې کړل. له هغه وروسته، ښاغلي شجاع الدین شجاع د بلخ د ولایت مقام اداري مرستیال په سوداګریزو راکړو ورکړو کې د افغانۍ پر کارولو ټینګار وکړ او زیاته یې کړه چې د بلخ ولایت مقام د افغانۍ د دودولو او د افغانۍ د بانکنوټونو د سمې کارونې په اړه د خلکو د هڅولو په برخه کې د هر ډول مرستې ژمنه کوي.
همدا ډول، ښاغلي سید عبدالله مسرور د یاد ولایت د ولایتي شورا مرستیال وویل د هر ولایت ولایتي شورا د هغه ولایت د خلکو د ارادې تمثیلوونکې وي او د ټولنې له ټولو قشرونو سره په اړیکه کې وي او کولای شي له دې لارې په معاملو کې د افغانۍ د کارولو او په سمه توګه د بانکنوټونو د ساتلو په اړه اغیزمن او ګټور تبلیغات وکړي.
همدارنګه، د بلخ ولایت د حج او اوقافو د ریاست چارواکو هم د افغانۍ د دودولو او په سمه توګه د بانکنوټونو د ساتلو په اړه د تبلیغ په برخه کې د مرستې ژمنه وکړه.
له بلې خوا د بلخ ولایت د پوهنې د ریاست مسوولینو په ورځنیو راکړو ورکړو کې د افغانۍ د دودولو، کارولو او ساتلو د طریقو په اړه خپله خوښۍ څرګنده کړه او ژمنه یې وکړه چې یاده موضوع به د ښوونځیو د آمرینو او مدیرانو له لارې د ښوونې پر مهال زده کوونکو ته ورسوي.
د یادونې وړ ده چې یادو مسوولینو د مزار شریف د ښاروالۍ ریاست، د سرپل د ښاروالۍ ریاست، د سرپل د حج او اوقافو ریاست، د سر پل د پوهنې ریاست، د سرپل ولایتي شورا، د میمنې د ښاروالۍ ریاست، د جوزجان د پوهنې ریاست او نورو اړوندو ادارو سره د افغانۍ د ژر زړیدلو د مخنیوۍ په تړاو لیدنې او خبرې اترې ترسره کړي دي.