د بازار عملیات لوی آمریت
لیدلوری: د پانګې د ساتلو په موخه د اسعاري زېرمو د مدیریت د یو منظم سیستم درلودل، د اسعاري نغدینګۍ تأمینول او د افغانۍ ارزښت د ټیکاو ساتلو په موخه د مناسبې ګټې ترلاسه کول او د پولي سیاست اغېزناکه پلي کول.
ماموریت: د اسعاري زېرمو مدیریت، د اسعارو او د بیه لرونکو پاڼو د لیلامونو په ترسره کولو سره د پولي سیاست پلي کول، دولتي او نیمه دولتي ادارو لپاره د اعتبار لیکونو صادرول او د اړوندو منظور شویو کړنلارو پر بنسټ د رسمي تبادلې د نرخونو خپرول، دي.
موخې:
د بازار عملیاتو لوی آمریت لاندې موخې لري:
د پولي سیاست اغېزناکه پلي کول؛
د نړیوالو اسعاري زېرمو مدیریت؛
د اسعاري کافي سیالیت تأمینول؛
دولتي او نیمه دولتي ادارو ته د اعتبار لیکونو برابرول؛
د شرایطو وړ بانکونو لپاره د شپني او اعتباري اسانتیاوو مدیریت کول؛
د افغانستان بانک اړوندو امریتونه او وړ بانکونو ته د لازمو بانکي اسانتیاوو برابرول؛ او
د رسمي تبادلې نرخ په منظمه توګه خپرول.
جوړښت:
د بازار عملیات لوی آمریت (۲۲) تنه کارکوونکي لري چې د دندو د لایحو په پام کې نیولو سره په لاندې پنځو مدیریتونو کې په دندو ګمارل شوي دي:
۱. د اسعاري زېرمو د تنظیم مدیریت
د دې مدیریت بنسټیزې دندې عبارت دي له:
د اسعاري زېرمو مدیریت او پانګونه او په اړه یې د دوره اي راپورونو جوړول؛
له معامله لرونکو بانکونو او اړوندو بهرنیو مالي ادارو سره د منظمو اړیکو ساتل؛
د اسعاري اړتیاوو د پوره کولو لپاره د کافي اسعاري زېرمو له موجودیت څخه ډاډ ترلاسه کول؛
د پانګې اچونې کمېټو د غونډو همغږي کول؛ او
د پانګونو او امانتونو اېښودلو د بهیر څارل.
۲. د اسعاري زېرمو د خطرونو د شننې مدیریت
د دې مدیریت بنسټیزې دندې عبارت دي له:
د اسعاري زېرمو د خطرونو مدیریت کول؛
د خطرونو د مدیریت د دوره اي راپورونو جوړول؛
د اسعاري زېرمو د خطرونو په اړه د دوره اي تحلیلي راپورونو چمتو کول؛
د نړیوالو بازارونو او د پانګونې د فرصتونو په اړه څېړنې؛ او
د نړیوالو بازارونو او د اسعاري زېرمو د پانګونې فرصتونو په اړه څېړنې کول؛ او
په دوره اي توګه، د اسعاري ټوکرۍ د شاخصونو بیا انډولول.
۳. د اسعارو لیلام او تبادلې نرخ مدیریت
د دې مدیریت بنسټیزې دندې عبارت دي له:
د رسمي تبادلې نرخونو جوړول او په دې اړه د اړوندو ادارو پوښتنو ته ځواب ورکول؛
د تبادلې نرخ اړوندو مواردو په تړاو له بازار څخه د منظمو سروې ګانو په لاره اچول؛
له اړوندې مقررې او کړنلارې سره سم د اسعارو لیلامونو په لاره اچول؛ او
د لیلام اړوندو مواردو په تړاو په لیلام کې له ګډون کوونکو، ملي او نړیوالو ادارو سره رسمي اړیکې (مراوده) درلودل.
۴. د بیه لرونکو پاڼو او بانکی اسانتیاوو مدیریت
د دې مدیریت بنسټیزې دندې عبارت دي له:
د اړوندې مقررې او کړنلارې سره سم د لیلامونو مدیریت کول او د بیه لرونکو پاڼو او بانکي محصولاتو اخیستل؛
له اړوندې مقررې سره سم د بیه لرونکو پاڼو د دویمي بازار څارل؛
د اړوندو امریتونو او وړ بانکونو ته د بانکي اسانتیاوو برابرول؛ او
د اړوندو کړنلارو سره سم د الزامي زېرمو عیارول او د مالي ادارو د نور مکلفیتونو د مراحلو طی کول.
۵. د اعتبار لیکونو مدیریت
د دې مدیریت بنسټیزې دندې عبارت دي له:
دولتي او نیمه دولتي ادارو لپاره د اعتبار لیکونو صادرول او د وضعیت په اړه یې راپور ورکول؛
د اعتبار لیکونو لپاره د تعدیل، لغوې او اداینې د اسانتیاوو برابرول؛ او
له اړوندو ادارو او معامله لرونکو بانکونو سره د اعتبار لیکونو اړوند موضوعاتو په تړاو اړیکي ټینګول.