د اداینو لوی آمریت
د افغانستان بانک د اداینو لوی آمریت د اداینیزو سیستمونو پر وړاندې مسئولیت لري ترڅو د بانکونو او اداینیزو سیستمونو له لارې خلکو لپاره د معاملو د تصفیې او تسویې خدمتونه وړاندې کړي او همدارنګه په هېواد کې د مالي سکتور لپاره د کورنیو او نړیوالو اداینیزو سیستمونو د ودې او پراختیا لپاره هڅه او کوښښ وکړي. د اداینو لوی آمریت د اداینو د تصفیې او تسویې په برخه کې د خپلو سیستمونو له فعالیت څخه ډاډ ترلاسه کوي چې سیستمونه د بانکی سکتور او نورو کاروونکو لپاره په چټک، خوندي، اغېزناک، ډاډمن او د لاسرسي وړ ډول کار کوي. د افغانستان بانک د اداینو لوی آمریت د کورنیو او نړیوالو معاملو په مدیریت کې مهم رول درلودلی چې په پیل کې د شیفر او ټلیګراماتو مدیریت په نوم پېژندل کېده، له ۲۰۰۳ کال راهیسې د سویفټ په سیستم کې د افغانستان بانک له غړیتوب او په ۲۰۰۴ کال کې د AFTSسیستم په جوړېدو او پلي کېدو سره دې آمریت د اداینو د برېښنايي کولو لپاره هڅه کړې چې د خصوصي بانکونو په جوړولو او پراختیا سره، ACSS د بانکونو ترمنځ د اداینو سیستم په 2005 کال کې او د ICPSS سیستم په 2017 کال کې د بانکونو ترمنځ او ملي اداینو د اسانتیاو لپاره وکارول شول او په 2020 کال کې د ATS(RTGS) پرمختللی سیستم او په 2023 کال کې د ACSS/ICPSS نوی سیستم چې د مالیې وزارت او خصوصې بانکونو له سیستمونو سره د نښلېدو وړتیا لري، لوړ کړ ترڅو اداینیز خدمتونه له نړیوالو معیارونو سره یو شان کړي.
لیدلوری
د دې آمریت لیدلوری د سیستمونو غړو او هغو کسانو لپاره چې له اداینیزو سیسمونو څخه ګټه پورته کوي د کورنیو او نړیوالو اداینو د ترسره کولو لپاره د وروستۍ ټیکنالوژۍ او اداینیزو سیستمونو عملي کول او د هېواد په مالي بازار کې د خوندیتوب او ټینګښت تأمینول او زیاتول رانغاړي.
دندې
د دې آمریت دندې په چټک، خوندي، اغېزناک، د باور وړ ډول، د ملي اداینو د سیستم رامنځته کول او د اداینو سیستمونو پراختیا، د عامه ګټو د ودې لپاره د تخنیکي پرمختګونو په پام کې نیولو سره د اداینو سیستمونو رامنځته کول، د مالي سکتور او له لارې یې د افغانستان خلکو ته پر خپل وخت له نړیوالو معیارونو سره سم د کورنیو او بهرنیو اداینو د خدمتونو وړاندې کول، د پالیسیو، کړنلارو او د دندو د لایحو بیاکتل، د اداینو سیستمونو پراختیا، په مرکز کې د سوداګریزو بانکونو او د دوی د ولایتي نمایندګیو د بانکي حسابونو نښلول، په برېښنايي ډول د عوایدو راټولولو د اسانتیاوو او پراخولو لپاره د افغانستان بانک د بانکونو ترمنځ د اداینو په سیستمونو کې د دولتي عوایدو د حسابونو نښلول او د اړوندو تخنیکي شعبو په همکارۍ د اداینو سیستمونو په برخه کې د تخنیکي ستونزو حلول رانغاړي.
د اداینو لوی آمریت جوړښت
د اداینو لوی آمریت د تشکیلاتي جوړښت له پلوه 33 کارکوونکي لري او د دندو له مخې په یو لوی مرستیالیت او دوو ارشدو مدیریتونو وېشل کیږي چې په لاندې ډول تشریح کیږي:
عملیاتي ارشد مدیریت:
دا مدیریت د داخلي اداینو اړوند په ای سي ایس ایس (ACSS)، آی سي پي ایس ایس (ICPSS) او ای ټي ایس (ATS) سیستمونو کې د برېښنایی اداینو د تصفیې او تسویې، د واک لرونکو چارواکو د پرېکړو له مخې د مالیې وزارت د ګمرکونو ریاست د اسیکوډا په سیستم کې د پی نمبر (P) د اجراء کولو، د افغانستان بانک د لیلام له لارې د اسعارو اړوندو معاملو د تصفیې او تسویې، د اړوندو شعبو له سپارښتونو سره سم له معامله لرونکو بانکونو (Correspondent Banks) سره د افغانستان بانک په حسابونو کې د سویفټ (SWIFT) سیستم له لارې د نړیوالو برېښنایي وارده او صادره پیغامونو طی مراحلو، د برېښنایي او نغدي ګمرکي معاملو د همغږۍ او تطبیقولو او د بانکونو ترمنځ د اداینیزو معاملو د تطبیقولو او کنټرول مسئولیت په غاړه لري.
د اداینو، پلان جوړونې او د پالیسۍ پراختیا تخنیکي ارشد مدیریت
د کلني کاري پلانونو د جوړولو، د پالیسیو، مقرراتو، کړنلارو او د دندو د لایحو د بیا کتلو، د اداینیزو سیستمونو د پراخه کولو، د کورنیو او نړیوالو اداینو د سیستمونو د اداره کوونکي (Admin)، په مرکز او د دوی په ولایتي نمایندګیو کې د سوداګریزو بانکونو د حسابونه نښلولو، د افغانستان بانک د بانکونو ترمنځ د اداینو په سیستمونو کې په برېښنايي ډول د (ګمرکي) عوایدو په راټولولو کې د اسانتیا او پراختیا د برابرولو په موخه د دولتي عوایدو د حسابونو نښلول او د اړوندو تخنیکي شعبو په همکارۍ د اداینیزو سیستمونو په برخه کې د تخنیکي ستونزو د حلولو مسئولیت په غاړه لري.