د افغانستان بانک او مسفا ادارې تر منځ د همکاریو په اړه غونډه جوړه شوه
۱۴۴۵ جمادی الاول ۲ مه – د افغانستان بانک او د افغانستان لپاره د کوچنیو پورونو د پانګونو د ملاتړ مرکز (مسفا) ترمنځ د همکاریو ګډه غونډه جوړه شوه چې په یاده غونډه کې خلکو ته د پورونو ورکولو، مالي آسانتیاوو او د یو شمېر نورو اړوندو موضوعاتو په اړه خبرې اترې وشوې او د دې سکتور د پیاوړتیا او ملاتړ په هکله نظریات شریک شول.
د افغانستان بانک سرپرست رئیس ښاغلي هدایت الله بدري د دې ادارې له استازو سره د قوانینو او مقرراتو په رڼا کې د هر ډول همکارۍ ژمنه وکړه او یادونه یې وکړه چې د افغانستان بانک ژمن دی چې د هېوادوالو لپاره په مالي او بانکي برخو کې اړینې آسانتیاوې رامنځته کړي.
په دغه غونډه کې د افغانستان بانک لومړي مرستیال ښاغلي نور احمد آغا د هېواد په اقتصاد کې د کوچنیو پورونو مؤسساتو رول د ارزښت وړ یاد کړ او په خپل نوبت یې له دې ډول مؤسساتو سره د افغانستان بانک د همکارۍ ژمنه وکړه.
د یادونې وړ ده چې د مسفا ادارې استازو د افغانستان بانک سره په همغږۍخلکو ته د پورونو ورکولو او نورو مالي آسانتیاوو د رامنځته کولو ژمنه وکړه.
