د افغانستان بانک خبرتیا!
د افغانستان بانک د هېواد پولي بازارونه په دقت سره څاري او د بیو د ټیکاو ساتلو په موخه اړینې کړنې ترسره کوي. د دې کړنو په دوام، د زړو بانکنوټونو د بدلولو پروسه پیل شوې او په ټول هېواد کې دوام لري. د دې ترڅنګ، د افغانۍ دودولو پروسه هم پیل شوې او په تدریجي توګه به له پلان سره سم پلې شي.
د افغانستان بانک کافي سرچینې په واک کې لري او د اړتیا په صورت کې د هېواد د بازارونو او مالي ادارو افغانۍ او اسعاري اړتیاوې پوره کوي.
په همدې اساس، له دې لارې ټولو هېوادوالو ته ډاډ ورکول کېږی چې په کافي اندازه افغانۍ بانکنوټونه د افغانستان بانک په واک کې دي او د پخوا په څیر د هېواد د پولي شاخصونو په پام کې نیولو سره یې په خپرولو او توزیع کولو اقدام کېږي او په دې برخه کې باید هیڅ ډول اندېښنه نه وي.
سربېره پر دې، د هېواد له پولي بازارونو په منظمه توګه څارنه کېږي. که چېرې د ناسمې استفادې کړنې ولیدل شي، له سرغړوونکو سره به جدي او قانوني چلند وشي.
