د پاسپورت ریاست په ودانۍ کې د ننه د افغانستان بانک د نمایندګۍ فعالېدل
۱۴۴۴ محرم الحرام ۲۲ – د افغانستان بانک خلکو ته د غوره او پر وخت خدمتونو د وړاندې کولو په موخه خپله اوومه ښاري څانګه د پاسپورت ریاست په ودانۍ کې فعاله او ګټې اخیستنې ته وسپارله. د افغانستان بانک دویم مرستیال ښاغلي عبدالقدیر احمد د یادې ودانۍ د پرانیستې پر مهال یادونه وکړه چې د افغانستان بانک هڅه کوي چې د خلکو لپاره غوره او پر وخت خدمتونه وړاندې کړي.
د نوموړي په خبره د پاسپورت ریاست په د ننه کې د افغانستان بانک د اوومې ښاري څانګې په فعالېدو سره به د هغو هېوادوالو لپاره ډېرې اسانتیاوې رامنځته شي چې غواړي پاسپورتونه تر لاسه کړي، تر دې وړاندې خلک اړ وو چې د پاسپورت تعرفې د تسلیمۍ لپاره د پاسپورت ریاست څخه د باندې د افغانستان بانک نمایندګیو ته مراجعه وکړي، خو لدې سره به د پاسپورت ټولې چارې په یوه ودانۍ کې بشپږېږي.
د افغانستان بانک دا نمایندګي چې د پاسپورت په ریاست کې فعاله شوېده ۱۵ غرفې لري چې له دې ډلې ۱۰ یې نارینه او ۵ یې د ښځینه مراجعینو لپاره ځانګړې شوې دي.
د یادونې وړ ده چې په دې غونډه کې د پاسپورت ریاست مرستیال د افغانستان بانک له مسئولینو مننه وکړه چې د پاسپورت ریاست په دننه کې یې خپله ودانۍ پرانیسته، نوموړي له خپله اړخه د افغانستان بانک سره د هر ډول همکارۍ ژمنه وکړه.
باید وویل شي چې د افغانستان بانک هڅه کوي چې د درنو هېوادوالو لپاره په بېلابېلو مالي او بانکي برخو کې اړینې اسانتیاوې رامنځته کړي.
