په ننګرهار پوهنتون کې د افغانستان بانک د ټولیزو سیاستونو، موخو او دندو په اړه د روزنیز ورکشاپ جوړېدل

Mpoya
یکشنبه ۱۴۰۲/۱۲/۱۳ - ۱۶:۵۷
په ننګرهار پوهنتون کې د افغانستان بانک د ټولیزو سیاستونو، موخو او دندو په اړه د روزنیز ورکشاپ جوړېدل

۱۴۴۵ د شعبان المعظم ۲۱ مه – د افغانستان بانک له لوري د ننګرهار پوهنتون د اقتصاد پوهنځي د استادانو او محصلینو لپاره د افغانستان بانک د ټولیزو سیاستونو، موخو او دندو په اړه یو ورځنی روزنیز ورکشاپ جوړ شو. دا ورکشاپ چې د ننګرهار په پوهنتون کې جوړ شوی وو، شاوخوا ۲۰۰ محصلینو په کې ګډون درلود.

د دې ورکشاپ په پیل کې د ننګرهار پوهنتون رئیس ښاغلي شیخ انعام الله مدني خبرې وکړې، نوموړي د افغانستان بانک پلاوي ته د ښه راغلاست ویلو تر څنګ د محصلینو د پوهاوي کچې د لوړولو په برخه کې د دې ډول ورکشاپونو جوړول د ارزښت وړ یاد کړل.

ښاغلي مدني د هېواد په اقتصادي پرمختګ کې د بانکونو رول مؤثر وبللو او زیاته یې کړه چې دا رول هغه وخت لا ډېر ګټور کېږي چې اکاډمیکه ټولنه له دې سکتور سره لا ډېره همغږې ولري. نوموړي له اکاډمیکې ټولنې سره د افغانستان بانک د اړیکو د ټینګښت ستاینه وکړه او له محصلینو یې وغوښتل چې د یاد ورکشاپ له موادو په استفادې د افغانستان بانک او بانکي سکتور سره همکاري وکړي او په دې وسیله له دې سکتور ملاتړ وکړي.

د دې ورکشاپ په بله برخه کې د افغانستان بانک د اسلامي بانکوالۍ لوی آمر ښاغلي دکتور محمد یوسف سلیم د افغانستان بانک د مشرتابه پلاوي په استازولۍ خبرې وکړې او د اذهانو په جوړونه کې یې د اکاډمیکو ټولنو رول مهم یاد کړ او د دې ورکشاپ له جوړولو یې موخه د افغانستان بانک له سیاستونو او لاسته راوړنو څخه د اکاډمیکې ټولنې او محصلینو پوهاوی او خبرول یاد کړل.

ښاغلي محمد یوسف سلیم د خپلو خبرو په بله برخه کې د پولي سیاستونو د تطبیق، افغانۍ د ټیکاو، د انفلاسیون د کنترول، صرافیو او پولي خدمتونو د فعالیتونو د معیاري کولو، اسلامي بانکوالۍ د پراختیا او یو شمېر نورو اړوندو موضوعاتو په اړه د ارقامو په ورکولو سره د افغانستان بانک له لاسته راوړنو څخه یادونه وکړه.

د دې ورکشاپ په اوږدو کې د صرافیو او پولي خدمتونو د فعالیتونو میکانیزه کولو، د اسلامي بانکوالۍ له لوري په معاملاتو کې په خوندي او عادلانه ډول د شتمنیو د وېش، بانکي سکتور د ښه والي، مالي خدمتونو ته د خوندي، آسانه او غوره لاسرسي په اړه د اسلامي بانکوالۍ د مرستیال ښاغلي مفتي عبدالله آخوندزاده، د غیر بانکي مالي مؤسساتو د څارنې د لوی آمریت مرستیال ښاغلي شاه‌پور میاخېل، د مالي خدمتونو د پراختیا د لوی آمریت مرستیال ښاغلي خالد واحدي، د بانکي څارنې د لوی امریت د مالي ثبات کمېټې د مدیر ښاغلي عبدالحسیب امانت او د افغانستان بانک د ختیځ زون اقتصادپوه ښاغلي تاج محمد تمکین له لوري پریزینټیشنونه وړاندې شول.

د غونډې په وروستۍ برخه کې د افغانستان بانک د موخو، دندو او ټولیزو سیاستونو په اړه د افغانستان بانک د مسئولینو، محصلینو او استادانو ترمنځ ګرد میز تشکیل شو او پوښتنو ته ځوابونه وویل شول.

وروستي خبرونه

یکشنبه ۱۴۰۳/۲/۳۰ - ۱۴:۱۷
Background image

د افغانستان بانک سرپرست رئیس د ملګرو ملتونو د سر منشي له مرستیالې سره ولیدل

۱۴۴۵ ذوالقعدة الحرام ۱۰– د افغانستان بانک د ټولو سرپرست رئیس ښاغلي هدایت الله بدري د ملګرو ملتونو د سر منشي له مرستیالې آغلې روزماري دیکارلو سره د افغانستان بانک د عالي شورا په تالار کې. . .

چهارشنبه ۱۴۰۳/۲/۲۶ - ۱۶:۷
Background image

په هیواد کې معیاري بانکي خدمتونو ته د خلکو د لاسرسي د اسانتیا په موخه د غونډې جوړېدل

۱۴۴۵ ذوالقعدة الحرام ۶ مه - د افغانستان بانک د لومړي مرستیال ښاغلي نوراحمد اغا په مشرۍ معیاري، ارزانه، آسانه او با کیفیته بانکي خدمتونو ته د خلکو د لاسرسي په موخه د افغانستان بانک د. . .

دوشنبه ۱۴۰۳/۲/۱۰ - ۱۳:۴۰
Background image

د افغانستان بانک 16 میلیونه امریکايي ډالره لیلاموي

1445 شوال المکرم 20 مه - د افغانستان بانک غواړي چې د 1445 کال د شوال المکرم د میاشتې په 21 نېټه (1403/02/11) د سه شنبې په ورځ د داوطلبۍ له لارې تر (16) میلیونه امریکايي ډالرو پورې د. . .

بېرته خبرونه ته