د افغانستان بانک د خپلو کارکوونکو د ظرفیت لوړولو ته ژمن دی
کابل، ۱۳۹۸ کال د غويي ۳۱– د مالي خدماتو د پراختیا د پالیسۍ په اړه شپږ میاشتۍ روزنیز تخصصي پروګرام چې د AFI نړیوال سازمان په نږدې همکارۍ سره د فرانکفورټ د مالي چارو او مدیریت د پوهنتون لخوا د مالي خدماتو د پراختیا د عمومی آمریت د کارکوونکو لپاره جوړ شوی ؤ، په بریالي توګه پای ته ورسېده.
باید وویل شي چې دا پروګرام په انلاین ډول تدریس شوی او د تصدیق لیک د ترلاسه کولو په موخه د هغه ازموینه په حضوري ډول د افغانستان په مالي او بانکدارۍ انسټیټوټ کې ترسره شوې ده.
د مالي خدماتو د عمومي آمریت کارکوونکو په بریالی توګه د دغې ازموینې په سرته رسولو سره د مالي خدماتو د پراختیا پالیسۍ (Certified Expert in Financial Inclusion Policy) په برخه کې د تخصص تصدیق لیکونه ترلاسه کړل.
د یادولو وړ ده چې د دې روزنیز پروګرام لګښت د نړیوال بانک لخوا د مالي ټینګښت پروژې په چوکاټ کې ورکړل شوی دی.