د افغانستان بانک د نړۍ غوره ثبات لرونکی پولي واحد کنټرولوي
د افغانستان بانک په خپل غوره مدیریت او د معقولو پولي سیاستونو په پلي کولو سره توانېدلی دی چې د اسعارو پر وړاندې د افغانۍ له ارزښت څخه په ښه ډول ساتنه وکړي.
دا مهال افغانۍ په نړیواله کچه د یو با ثباته پولي واحد په توګه منل شوې او په کور د ننه یې د مخکنیو کلونو په پرتله په سوداګریزو راکړو ورکړو کې کارونه زیاته شوې ده. هغه راپور چې په دې وروستیو کې د بلومبرګ نړیوالې رسنۍ لخوا خپور شوی دی ښیي چې افغانۍ په تېر یو کال کې شاوخوا ۱۴ سلنه لوړه شوې او په نړیوال لیست کې یې دریم ځای خپل کړی دی.
په یاد راپور کې راغلي چې په سوداګریزو راکړو ورکړو کې د اسعارو پر کارونه بندیزونه، د ډالرو د قاچاق مخنیوی، د افغانستان بانک له لوري د پولي سیاستونو د بېلابېلو ابزارونو تطبیق، په انلاین غیرقانوني فعالیتونو د بندیزونو لګول د افغانۍ د ارزښت لوړېدنې عوامل دي.
د یادونې وړ ده چې له دې وړاندې هم یو شمېر نړیوالو ادارو او بنسټونو د افغانۍ د ارزښت ساتنې په برخه کې د افغانستان بانک پر مثبتو کړنو د تائید مهر لګولی دی.
