د پیسو د نړیوال صندوق له چارواکو سره آنلاین غونډه
۱۴۰۰ کال د چنګاښ ۱۵ مه – د افغانستان بانک سرپرست ښاغلي اجمل احمدي د یو ویډیو کنفرانس په لړ کې د پیسو د نړیوال صندوق له چارواکو سره د افغانستان او یاد صندوق پر ګډو اقتصادي پروګرامونو خبرې وشوې او د نظرونو تبادله تر سره شوه.
د غونډې په پیل کې د پیسو د نړیوال صندوق لوړپوړو چارواکو د نړۍ پر مهمو اقتصادي بدلونونو په ځانګړې توګه د افغانستان پر اقتصادي وضعیت د کرونا ویروس پر ویجاړونکو اغېزو، مالي ټیکاو، بې روزګارۍ، چاپیریال ساتنې او نړیوالو مرستو خبرې وکړې.
ورپسې، د افغانستان بانک سرپرست ښاغلي اجمل احمدي خبرې وکړې او د افغانستان پر اقتصادي موضوعګانو، د کرونا د ټولشموله ویروس څخه د تېریدو پر حالت، د پولي سیاست د پلي کولو په ځانکړې توګه د لوی اقتصاد د مقداري موخو پر ټینګوالي او پیاوړتیا او نورو اقتصادي متغیرونو لکه انفلاسیون، د اداینو بیلانس، د هېواد پر اقتصادي وده او اسعاري زېرمو او همدارنګه د هېواد د مالي او بانکي نظام په برخه کې پر جوړښتي سمونونو هر اړخیز بحث وکړ.